Թրամփի լրագրողներին պատմել է Պուտինի հետ զրույցի մանրամասները

Հոկտեմբերի 16-ին մոտ երկու ժամ հեռախոսով զրուցել են ԱՄՆ և Ռուսաստանի նախագահները։ Ավելի ուշ Սպիտակ տունը զրույցը գնահատել էր արդյունավետ։ Իսկ թե ինչի՞ մասին են խոսել շուրջ երկու ժամ՝ Թրամփն է պատմել՝ լրագրողների հետ հանդիպմանը։

Լրագրող- Դուք գրել եք նախագահ Պուտինի հետ ձեր այսօրվա զրույցի մասին։ Դուք խոսել եք Հունգարիայում նրա հետ հանդիպման մասին։ Արդյո՞ք որոշակի ժամկետներ կամ ամսաթիվ կա։

Թրամփ- Ես կասեի՝ երկու շաբաթվա ընթացքում։ Բավականին արագ։ Ես կարծում եմ, որ դա շատ լավ հեռախոսազրույց էր։ Ես այն շատ արդյունավետ եմ համարում։ Բայց ես կհանդիպեմ նախագահ Պուտինի հետ, և մենք որոշում կկայացնենք։ Վաղը ես հանդիպում եմ նախագահ Զելենսկու հետ և կպատմեմ նրան զանգի մասին։ Մենք, իհարկե, խնդիր ունենք։ Այդ երկուսը միմյանց հետ այնքան էլ լավ չեն։ Նրանք սարսափելի հարաբերություններ ունեն։ Այսպիսով, ես կհանդիպեմ։ Մենք կհանդիպենք Հունգարիայում։ Վիկտոր Օրբանը կղեկավարի միջոցառումը։ Եվ դա իսկապես կարևոր է։ Անցյալ շաբաթ ավելի քան 7000 մարդ է զոհվել։ Դա անհեթեթություն է։ Եվ մենք կարծում ենք, որ մեզ կհաջողվի դա կանգնեցնել։ Մենք հույս ունենք, որ մեզ դա կհաջողվի։

Լրագրող- Դուք ասացիք, որ մեծ առաջընթաց կա։ Կարո՞ղ եք մի փոքր պատմել այդ մասին։ Փոխվե՞լ է Պուտինի տոնը։ Նա ձեզ ինչ-որ բա՞ն է ասել։

Թրամփ- Ես պարզապես զգում եմ... գիտե՞ք, ես ողջ կյանքս զբաղվել եմ դրանով։ Ես գործարքներ եմ կնքել։ Ես լավ եմ հասկանում գործարքներից։ Ես դա լավ եմ անում։ Անկեղծ ասած, չեմ կարծում, որ որևէ նախագահ երբևէ պատերազմ է ավարտել։ Իսկ ես ութ պատերազմ եմ ավարտել, այնպես չէ՞։ Կարծում եմ՝ շուտով սա էլ կանենք, հուսով եմ։ Բայց ես, ամենայն հավանականությամբ, կհանդիպեմ նրա հետ առաջիկա երկու շաբաթվա ընթացքում։

Լրագրող- Ի՞նչ պատմեցիք նրանց «Թոմահավկների» մասին։ Դուք քննարկե՞լ եք «Թոմահավկ» հրթիռները։

Թրամփ- Դե, մենք մի փոքր խոսել ենք այդ մասին։ Ես շատ բան չեմ ասել։ Բայց ես ձեզ կասեմ՝ մեզ՝ Ամերիկայի Միացյալ Նահանգներին, նույնպես «Թոմահավկներ» են պետք։ Մենք դրանցից շատ ունենք։ Բայց դրանք մեզ պետք են։ Մենք չենք կարող դրանք սպառել մեր երկրի համար։ Դրանք շատ հզոր են։ Շատ ճշգրիտ են։ Շատ լավն են։ Բայց դրանք մեզ էլ են պետք։ Այնպես որ, չգիտեմ, թե ինչ կարող ենք անել այս հարցում։

Լրագրող- Ինչո՞ւ եք կարծում, որ Պուտինի հետ երկրորդ հանդիպումն այժմ այլ արդյունքներ կտա։

Թրամփ- Ես չեմ սկսել այս պատերազմը։ Սա Բայդենի գործն է։ Ես եկա, և այստեղ լիակատար քաոս էր։ Սա կարող էր հանգեցնել Երրորդ համաշխարհային պատերազմի։ Դա տեղի չի ունենա։ Բայց կարող էր լինել։ Երբ ես հեռանում էի, այս մասին նույնիսկ չէին մտածում։ Չորս տարի ոչ ոք այս մասին չէր խոսում։ Ես խոսել եմ նախագահ Պուտինի հետ Ուկրաինայի մասին։ Դա նրա համար սրբություն էր։ Բայց նա երբեք նման բան անել չէր պատրաստվում։ Եվ այս ամենը տեղի ունեցավ շատ վատ որոշումների պատճառով, որոնք կայացվել էին։