Թրամփը Տոկիոյում է. օրակարգում առևտուրն ու անվտանգությունն են

ԱՄՆ նախագահ Դոնալդ Թրամփը ժամանել է Տոկիո՝ իր ասիական շրջագայության շրջանակներում, որի գլխավոր նպատակներն են առևտրային նոր համաձայնությունների կնքումը և անվտանգության հարցերի շուրջ դաշնակիցների դիրքորոշումների հստակեցումը։ Այս այցը նախորդում է այս շաբաթվա վերջին Հարավային Կորեայում Չինաստանի նախագահ Սի Ծինփինի հետ կայանալիք առանցքային գագաթնաժողովին, որին սպասում է ողջ աշխարհը։

Տոկիոյում Թրամփի բանակցությունների օրակարգը բավականին հագեցած է։ Նախատեսված են հանդիպումներ կայսր Նարուհիտոյի և Ճապոնիայի նորընտիր վարչապետ Սանաե Տակաիչիի հետ։ Սա Ճապոնիայի առաջին կին վարչապետի համար լուրջ դիվանագիտական փորձություն է՝ ամրապնդելու Վաշինգտոնի հետ դաշինքը և ցույց տալու անվտանգության ոլորտում համագործակցությունը խորացնելու պատրաստակամությունը։

Բանակցությունների հիմնական թեմաներից է առևտուրը։ Ավելի վաղ Թրամփին հաջողվել էր Ճապոնիայից ստանալ 550 միլիարդ դոլարի ներդրումային խոստում՝ ներմուծման մաքսատուրքերի մեղմացման դիմաց։

Ակնկալվում է, որ Տակաիչին կփորձի հետագայում ևս ամրապնդել դիրքերը՝ խոստանալով ավելացնել ամերիկյան գյուղմթերքի, մասնավորապես՝ սոյայի, ինչպես նաև մեքենաների ու գազի գնումների ծավալները։

Առևտրից ոչ պակաս կարևոր է անվտանգության հարցը։ Թրամփը հետևողականորեն պահանջում է, որ Ճապոնիան ավելացնի իր պաշտպանական ծախսերը, հատկապես Չինաստանի աճող ռազմական ազդեցության ֆոնին։ Ի պատասխան՝ վարչապետ Տակաիչին արդեն հայտարարել է Երկրորդ համաշխարհային պատերազմից ի վեր Ճապոնիայի պաշտպանական կարողությունների ամենամեծ արդիականացումը արագացնելու մտադրության մասին։ Տոկիոն, որտեղ տեղակայված են արտերկրում ամերիկյան ամենամեծ ռազմական ուժերը, ձգտում է ցույց տալ իր հանձնառությունը դաշնակցային պարտավորություններին։