Թրամփը կոչ է անում դադարեցնել ռազմական գործողությունները Ուկրաինայում

Սպիտակ տանը ՆԱՏՕ-ի գլխավոր քարտուղար Մարկ Ռյուտեի հետ հանդիպմանը ԱՄՆ նախագահ Դոնալդ Թրամփը հանդես է եկել մի շարք հայտարարություններով, որոնք վերաբերում են համաշխարհային քաղաքականության առանցքային խնդիրներին՝ ուկրաինական հակամարտությանը և Ռուսաստանի հետ հարաբերություններին։ Բանակցությունների գլխավոր թեմաներից մեկը դարձել է Թրամփի որոշումը՝ չեղարկել պլանավորված հանդիպումը Ռուսաստանի նախագահ Պուտինի հետ, որը պետք է կայանար Բուդապեշտում։

Սեփական որոշումը մեկնաբանելով՝ Թրամփը նշել է.

«Տպավորություն ստեղծվեց, որ մենք չենք հասնի ցանկալի նպատակին»։ Սակայն նա բաց է թողել դուռը ապագա բանակցությունների համար՝ հավելելով. «բայց մենք կհանդիպենք ապագայում»։ Ուկրաինական ճգնաժամի կարգավորման իր տեսլականի մասին խոսելիս՝ Թրամփը հստակ առաջարկ է արել՝ կոչ անելով հակամարտության կողմերին անհապաղ դադարեցնել բոլոր ռազմական գործողությունները։ Նրա կարծիքով, առաջնային քայլը պետք է լինի ճակատում ձևավորված ներկայիս դիրքերի ամրագրումը։ ԱՄՆ նախագահը նաև իր մտահոգությունն է հայտնել Ռուսաստանի մտադրությունների վերաբերյալ՝ ենթադրելով, որ Մոսկվան ցանկանում է վերահսկողություն հաստատել «ամբողջ Ուկրաինայի» վրա։ Թրամփը հայտարարել է, որ թույլ չի տա նման սցենարի զարգացում։

Հանդիպման ընթացքում քննարկվել է նաև սպառազինությունների մատակարարման հարցը։ Թրամփը պարզաբանել է, որ Միացյալ Նահանգները զենք վաճառում է ՆԱՏՕ-ի դաշնակից երկրներին, այլ ոչ թե ուղղակիորեն Ուկրաինային։ Նա առանձնահատուկ պնդում է արել՝ նշելով, որ Ռուսաստանի խորքային տարածքներին հարվածներ հասցնելու համար Կիևն օգտագործում է բացառապես եվրոպական արտադրության հրթիռներ։ Այս թեմայի շրջանակում Թրամփը խոսել է նաև ամերիկյան «Թոմահավկ» հրթիռների մասին՝ դրանք բնութագրելով որպես գերհզոր և բարդ տեխնոլոգիա։

«Դա շատ հզոր զենք է, շատ ճշգրիտ զենք, և, հավանաբար, հենց դրա համար էլ այն այդքան բարդ է։ Որպեսզի սովորեն դրանից օգտվել, պահանջվում է մեկ տարվա ինտենսիվ մարզում։ Իսկ մենք գիտենք, թե ինչպես օգտվել դրանից, և չենք պատրաստվում ուրիշներին սովորեցնել»,- ընդգծել է նա՝ հստակեցնելով, որ այս տեխնոլոգիաների տիրապետումը մնալու է բացառապես ամերիկյան կողմի իրավասության ներքո։

Թրամփը նաև հույս է հայտնել, որ Ռուսաստանի դեմ սահմանված նոր պատժամիջոցները երկարատև չեն լինի։ Խաղաղության հասնելու գործում նա կարևորել է նաև Չինաստանի դերը՝ նշելով, որ նախագահ Սի Ծինպինը կարող է էական ազդեցություն ունենալ խաղաղ գործընթացի վրա։ Նրա հետ հանդիպումը մնում է Սպիտակ տան ղեկավարի օրակարգում։