Թրամփն փորձում է համոզել Օրբանին․ Ռյուտե

Վաշինգտոնի և Բուդապեշտի միջև քաղաքական լարվածությունը սրվում է ռուսական էներգակիրների շուրջ։ Մինչ ԱՄՆ-ը պահանջում է դադարեցնել Ռուսաստանի ֆինանսավորումը, Հունգարիան պնդում է, որ այլընտրանք չունի։ ՆԱՏՕ-ի գլխավոր քարտուղար Մարկ Ռյուտեն CNN-ին տված հարցազրույցում հայտարարել է, որ ԱՄՆ նախագահ Դոնալդ Թրամփը անձնական ջանքեր է գործադրում՝ համոզելու Հունգարիայի վարչապետ Վիկտոր Օրբանին դադարեցնել ռուսական նավթի գնումները։

Ռյուտեի խոսքով՝ ինքը լիովին համամիտ է Թրամփի դիրքորոշմանը, թե եվրոպացի դաշնակիցները պետք է ամբողջությամբ հրաժարվեն ագրեսոր պետությունից էներգակիրներ ներկրելուց։ Ներկայումս Եվրամիության անդամներից միայն Հունգարիան և Սլովակիան են շարունակում գնել ռուսական նավթ։

«Ես գիտեմ, որ Եվրահանձնաժողովի նախագահ Ուրսուլա ֆոն դեր Լայենը աշխատում է այս ուղղությամբ։ Ես նաև տեղյակ եմ, որ նախագահ Թրամփը անձամբ է զբաղվում այս հարցով, այդ թվում՝ ուղիղ բանակցելով Հունգարիայի վարչապետ Վիկտոր Օրբանի հետ», - նշել է Ռյուտեն։

Այս հայտարարությունը հաջորդել է սեպտեմբերի 4-ին Թրամփի և եվրոպացի առաջնորդների, այդ թվում՝ Ուկրաինայի նախագահ Վոլոդիմիր Զելենսկու միջև տեղի ունեցած լարված հեռախոսազրույցին։ Ըստ լրատվամիջոցների՝ Թրամփը մեղադրել է ԵՄ երկրներին ռուսական ռազմական մեքենան ֆինանսավորելու մեջ։ Ի պատասխան՝ նրան տեղեկացրել են, որ ռուսական նավթ ներկրում են միայն Հունգարիան և Սլովակիան, որոնցից, ըստ Սպիտակ տան, Ռուսաստանը մեկ տարում ստացել է 1,1 միլիարդ եվրոյի եկամուտ։

Հետաքրքրական է, որ Ռյուտեի հետ հարցազրույցից հետո Թրամփը Օվալաձև աշխատասենյակում լրագրողների հետ զրույցում որոշակիորեն մեղմացրել է իր դիրքորոշումը՝ նշելով, որ Հունգարիան «իրականում չի կարող» նավթ գնել այլ վաճառողներից, քանի որ ելք չունի դեպի ծով։ Այս փաստարկը լիովին համընկնում է հունգարացի պաշտոնյաների հրապարակային հայտարարություններին։

Հունգարիայի արտաքին գործերի նախարար Պետեր Սիյարտոն բազմիցս ընդգծել է, որ Բուդապեշտը չի կարող հրաժարվել ռուսական հումքից՝ այլընտրանքի բացակայության պատճառով։ Նա նաև պնդել է, որ մինչ իրենք բացահայտ են գնում ռուսական նավթ, «այլ եվրոպական երկրներ» դա անում են գաղտնի և «շրջանցիկ ճանապարհներով», քանի որ «դա ավելի էժան է»։

Իրավիճակը լրացուցիչ լարվածություն է ստացել ամերիկացի սենատոր Լինդսի Գրեհեմի հայտարարությունից հետո, որը սպառնացել է Հունգարիային և Սլովակիային «հետևանքներով»՝ ռուսական նավթ գնելը շարունակելու դեպքում։ Այս պահին կարող ենք արձանագրել, որ չնայած Թրամփի անձնական միջամտությանը՝ Հունգարիան շարունակում է անդրդվելի մնալ իր դիրքորոշման մեջ՝ առաջնորդվելով սեփական էներգետիկ անվտանգության նկատառումներով։