Թրամփը անոնսավորում է նոր լայնածավալ մաքսատուրքեր

ԱՄՆ նախագահ Դոնալդ Թրամփը, իր «Truth Social» սոցիալական հարթակի միջոցով, հրապարակել է մի շարք հայտարարություններ, որոնք ազդարարում են ԱՄՆ առևտրային քաղաքականության կտրուկ խստացում։ Սկսած հոկտեմբերի 1-ից, Միացյալ Նահանգները կսահմանի զգալի մաքսատուրքեր մի շարք ապրանքատեսակների, այդ թվում՝ դեղորայքի, բեռնատարների և կահույքի ներմուծման համար։ Այս քայլերի հիմնական նպատակը, ինչպես նշվում է հրապարակումներում, ամերիկյան արտադրողներին պաշտպանելն ու արտադրությունները երկրի ներսում տեղակայելը խթանելն է։

Ամենաարմատական փոփոխությունը վերաբերում է դեղագործական արդյունաբերությանը։ Թրամփը հայտարարել է, որ ցանկացած բրենդային կամ արտոնագրված դեղագործական արտադրանքի ներմուծումը կհարկվի 100 տոկոսանոց մաքսատուրքով։ Սա, փաստացի, կրկնապատկում է ներկրվող դեղամիջոցների արժեքը՝ դրանք դարձնելով անմրցունակ ամերիկյան շուկայում։ Մաքսատուրքը չի կիրառվի այն ընկերությունների նկատմամբ, որոնք իրենց դեղագործական գործարանները կկառուցեն Միացյալ Նահանգների տարածքում։

Թրամփը նույնիսկ մանրամասնել է, թե ինչ է նշանակում «կառուցել»․ այն սահմանվում է որպես «շինարարության մեկնարկ» և/կամ «շինարարության փուլում գտնվող»։ «Հետևաբար, այս դեղագործական ապրանքների վրա մաքսատուրք չի սահմանվի, եթե շինարարությունն արդեն սկսվել է», - հավելել է նա։ Այս քայլը, ըստ էության, ուլտիմատում է համաշխարհային դեղագործական հսկաներին՝ կա՛մ տեղափոխել արտադրությունն ԱՄՆ, կա՛մ կորցնել ամերիկյան շուկան։

Բացի դեղագործությունից, Թրամփի հայտարարությունները թիրախավորել են նաև արդյունաբերական և կենցաղային ապրանքները։ Նույնպես հոկտեմբերի 1-ից կսահմանվի 25 տոկոսանոց մաքսատուրք բոլոր տեսակի ներկրվող բեռնատարների համար։ Այս որոշումը նա ուղղակիորեն պատճառաբանել է ամերիկյան ընկերություններին և արտադրողներին պաշտպանելու անհրաժեշտությամբ։

Միաժամանակ, զգալիորեն կբարձրանան ներմուծվող կահույքի մաքսատուրքերը։ Նախատեսվում է 50 տոկոսանոց տուրք սահմանել բոլոր խոհանոցային պահարանների, լոգասենյակի կահույքի և հարակից ապրանքների համար։ Բացի այդ, 30 տոկոսանոց մաքսատուրք կկիրառվի փափուկ կահույքի ներմուծման դեպքում։