Թրամփ. Ուկրաինան կարող է վերադարձնել իր բոլոր տարածքները

ԱՄՆ նախագահ Դոնալդ Թրամփը հանդես է եկել ուշագրավ հայտարարությամբ՝ նշելով, որ Ուկրաինան, Եվրամիության աջակցությամբ, ի վիճակի է պայքարելու և վերադարձնելու իր բոլոր տարածքները՝ մինչև պատերազմի սկիզբը գոյություն ունեցող սահմաններով։ Այս մասին նա գրել է իր Truth Social սոցիալական ցանցի էջում՝ իր դիրքորոշումը հիմնավորելով Ռուսաստանի ռազմական և տնտեսական իրավիճակի վերաբերյալ իրազեկվածությամբ։

«Ժամանակի, համբերության և Եվրոպայի ու, մասնավորապես, ՆԱՏՕ-ի ֆինանսական աջակցության պայմաններում, սկզբնական սահմանների վերականգնումը, որտեղից սկսվեց այս պատերազմը, միանգամայն հնարավոր է։ Ինչու՞ ոչ», - գրել է Թրամփը։ Նա Ռուսաստանին անվանել է «թղթե վագր»՝ ընդգծելով, որ իրական ռազմական տերությունը այս պատերազմը կհաղթեր մեկ շաբաթից էլ պակաս ժամանակում։ ԱՄՆ նախագահի խոսքով՝ Ռուսաստանը և նրա նախագահ Պուտինը գտնվում են լուրջ տնտեսական դժվարությունների մեջ, և սա գործելու ժամանակն է Ուկրաինայի համար։ Նա հավելել է, որ ԱՄՆ-ն կշարունակի զենք մատակարարել ՆԱՏՕ-ին, որպեսզի դաշինքն անի այն, ինչ անհրաժեշտ է համարում։

Թրամփի այս հայտարարությանը զուգահեռ, ՄԱԿ-ի Գլխավոր ասամբլեայի շրջանակներում տեղի է ունեցել հանդիպում նրա և Եվրահանձնաժողովի ղեկավար Ուրսուլա ֆոն դեր Լայենի միջև։ Եվրոպացի պաշտոնյան հայտարարել է, որ Թրամփը միանգամայն իրավացի է եվրոպական երկրներին ուղղված իր պահանջներում՝ զրոյի հասցնել ռուսական էներգառեսուրսների գնումները։

«Դա հենց այն է, ինչ Եվրոպան անում է մեր 19-րդ պատժամիջոցների փաթեթի շրջանակներում։ Մենք ուժեղացնում ենք ճնշումը՝ արգելելով ռուսական հեղուկ բնական գազի ներմուծումը եվրոպական շուկաներ և թիրախավորելով նավթավերամշակման գործարանները, նավթի առևտրով զբաղվողներին և երրորդ երկրներում գտնվող նավթավերամշակման ձեռնարկությունները», - նշել է ֆոն դեր Լայենը։ Նրա խոսքով՝ ԵՄ-ն ձգտում է վերջնականապես հրաժարվել ռուսական վառելիքից նույնիսկ նախատեսվածից՝ 2027 թվականից ավելի վաղ։