Թրամփը Պենտագոնը վերանվանում է «Պատերազմի դեպարտամենտ»

Նախագահ Դոնալդ Թրամփը պատրաստվում է սեպտեմբերի 5-ին ստորագրել գործադիր հրաման, որը պաշտոնապես կվերականգնի Պենտագոնի համար «Պատերազմի դեպարտամենտ» անվանումը, հայտնել է Սպիտակ տան պաշտոնյան:

Հրամանը թույլ կտա օգտագործել գերատեսչության սկզբնական անվանումը՝ «Պատերազմի դեպարտամենտ», ներկայիս «Պաշտպանության դեպարտամենտ» անվան հետ միասին, իսկ պաշտպանության նախարար Փիթ Հեգսեթը կդառնա «պատերազմի նախարար»: Հրամանը նաև հանձնարարում է Հեգսեթին ձեռնարկել օրենսդրական և գործադիր քայլեր՝ փոփոխությունը մշտական դարձնելու համար, հայտնում է Fox News-ը։

Իրականացման շրջանակներում Պենտագոնի հանրային կայքերը և գրասենյակային ցուցանակները կփոփոխվեն, ներառյալ հանրային կապերի ճեպազրույցների սենյակի վերանվանումը՝ «Պենտագոնի պատերազմի հավելված»:

Սպիտակ տունը սեպտեմբերի 4-ին հաստատել է, որ Թրամփը հրամանը կստորագրի հաջորդ օրը։

Հիշեցնենք, որ ԱՄՆ պատերազմի դեպարտամենտը ստեղծվել է 1789 թվականին՝ բանակը վերահսկելու համար, մինչ ռազմածովային ուժերն գործում էին իրենց առանձին դեպարտամենտի ներքո: Երկրորդ համաշխարհային պատերազմից հետո նախագահ Հարի Թրումանը ձգտեց միավորել զինված ուժերը, ինչը հանգեցրեց 1947 թվականին Ազգային ռազմական հաստատության ստեղծմանը, որը երկու տարի անց վերանվանվեց Պաշտպանության դեպարտամենտ:

Թրամփը 1949 թվականի փոփոխությունը բնութագրել է որպես քաղաքական կոռեկտության օրինակ, մինչդեռ Հեգսեթը նշել է, որ ներկայիս անվանումը «պարզապես ճիշտ չի հնչում»: