Թրամփը խոստացել է զորքերը դուրս չբերել Լեհաստանից

ԱՄՆ նախագահը խոստացել է զորքերը չհանել Լեհաստանից և նույնիսկ, հնարավոր է, ավելացնել զորակազմի թիվը։

«Մենք երբեք չենք քննարկել Լեհաստանից զորքերի դուրսբերման հնարավորությունը։ Մենք դա քննարկում ենք այլ երկրների վերաբերյալ, բայց մենք լիովին աջակցում ենք Լեհաստանին և կօգնենք նրան պաշտպանել իրեն», - ասել է Սպիտակ տան ղեկավարը՝ Վաշինգտոնում ընդունելով իր լեհ գործընկեր Կարոլ Նավրոցկուն։

Թրամփը հավելել է, որ Լեհաստանում ամերիկյան ռազմական ներկայությունը կարող է նույնիսկ ավելացվել, «եթե լեհերը դա ցանկանան»։

Ավելի ուշ Նավրոցկին մեկնաբանել է հանդիպման արդյունքները. «Թրամփը Լեհաստանին տվել է անվտանգության երաշխիքներ և ընդգծել է մեր համագործակցությունը որպես դաշնակիցներ ռազմական ոլորտում, սա մեծ հաջողություն է»։

Լեհաստանի նախագահը նաև Թրամփին հրավիրել է այցելել Վարշավա, սակայն այդ ենթադրյալ այցի ամսաթիվը դեռևս որոշված չէ։