Իսրայելի և «ՀԱՄԱՍ»-ի միջև բանակցությունները մտել են 48-ժամյա վճռորոշ փուլ

8 ՀՈԿ 2025 11:16

Եգիպտոսի Կարմիր ծովի ափին գտնվող Շարմ էլ Շեյխ հանգստավայրը վերածվել է ինտենսիվ դիվանագիտական բանակցությունների թատերաբեմի, որտեղ լուծվում է Գազայի հատվածում երկարատև պատերազմին վերջ դնելու հարցը։ Իսրայելի և «ՀԱՄԱՍ»-ի պատվիրակությունների միջև ընթացող անուղղակի բանակցություններին այսօր միանում են առանցքային միջնորդներ՝ Կատարի վարչապետը և Թուրքիայի բարձրաստիճան ներկայացուցիչները՝ հույս ունենալով վերջնականապես հասնել առաջընթացի։ Բանակցությունների հիմքում ԱՄՆ նախագահ Դոնալդ Թրամփի 21 կետանոց խաղաղության ծրագիրն է։

ԱՄՆ-ի դերակատարումն այս գործընթացում առանցքային է, ինչը հաստատում է անձամբ նախագահ Թրամփը։ «Իրական հնարավորություն կա, որ մենք կարող ենք ինչ-որ բան անել», - լրագրողներին ասել է նա՝ հավելելով, որ ամերիկացի դիվանագետներն ակտիվորեն ներգրավված են բանակցություններում։

Թրամփը նաև հնչեցրել է հստակ ժամկետ՝ ընդգծելով, որ առաջիկա 48 ժամը լինելու է վճռորոշ Գազայի ճակատագրի համար։ Այս հայտարարության լրջության մասին է վկայում նաև Axios-ի տեղեկությունը, համաձայն որի՝ ԱՄՆ նախագահի հատուկ բանագնաց Սթիվեն Ուիթքոֆը և նախագահի փեսա Ջարեդ Քուշները հանձնարարություն են ստացել չհեռանալ Եգիպտոսից, քանի դեռ պատանդներին ազատելու և ռազմական գործողությունները դադարեցնելու շուրջ վերջնական համաձայնություն ձեռք չի բերվել։

Բանակցությունների հաջողությունը, սակայն, կախված է կողմերի դիրքորոշումների մերձեցումից։ «ՀԱՄԱՍ»-ի գլխավոր բանակցող Խալիլ Էլ-Հայան հստակեցրել է պաղեստինյան կողմի գլխավոր պահանջը. խմբավորումը ցանկանում է «երաշխիքներ ստանալ նախագահ Թրամփից և հովանավոր երկրներից առ այն, որ պատերազմը մեկընդմիշտ կավարտվի»։

Իր հերթին, բանակցությունները հյուրընկալող Եգիպտոսը, ի դեմս նախագահ Աբդուլ Ֆաթահ Էլ-Սիսիի, իր լիակատար աջակցությունն է հայտնել գործընթացին։ Էլ-Սիսին անգամ պաշտոնապես հրավիրել է նախագահ Դոնալդ Թրամփին այցելել Եգիպտոս և անձամբ մասնակցել հրադադարի համաձայնագրի ստորագրմանը, եթե այն ձեռք բերվի։ Առաջիկա երկու օրը ցույց կտա, թե արդյո՞ք դիվանագիտական գերլարված ջանքերը կպսակվե՞ն հաջողությամբ՝ երկար սպասված խաղաղություն բերելով տարածաշրջանին և արդյո՞ք Թրամփը կմեկնի Եգիպտոս։

Առաջարկվող հոդվածներ

Մուտք գործեք կամ ստեղծեք անվճար ReOpen Media հաշիվ՝ մեկնաբանություններ տեղադրելու համարԳրանցվել