Թեհրանը` ջրի ծանր պակասի առջև. հնարավոր է մայրաքաղաքի տարհանում

Իրանի մայրաքաղաք Թեհրանը գտնվում է ջրի աղետալի պակասի շեմին, որն այնքան լուրջ է, որ երկրի նախագահ Մասուդ Փեզեշկիանը նոյեմբերի 7-ին հայտարարել է մայրաքաղաքի հնարավոր տարհանման մասին։

«Եթե մինչև նոյեմբերի վերջ Թեհրանում անձրև չգա, մենք ստիպված կլինենք մտցնել ջրի նորմավորում։ Իսկ եթե անձրև չլինի [այդ ժամկետից հետո էլ], մենք ստիպված կլինենք տարհանել Թեհրանը», - հայտարարել է Փեզեշկիանը։

Թեհրանի ջրամատակարարման պատասխանատուն նշել է, որ մայրաքաղաքի խմելու ջրի հիմնական աղբյուրը՝ Ամիր-Քաբիրի ջրամբարը, «պարունակում է ընդամենը 14 միլիոն խորանարդ մետր ջուր, ինչը կազմում է դրա տարողունակության ութ տոկոսը»։ Նա նախազգուշացրել է, որ այդ մակարդակով քաղաքը կկարողանա ինքն իրեն ապահովել ջրով միայն «երկու շաբաթվա ընթացքում»։

Թեհրանում ապրում է ավելի քան 10 միլիոն մարդ, որոնք օրական սպառում են շուրջ 3 միլիոն խորանարդ մետր ջուր։ Ջրի խնայողության միջոցառումների շրջանակներում, ըստ հաղորդումների, վերջին օրերին Թեհրանի մի քանի շրջաններում ժամանակավորապես դադարեցվել է ջրի մատակարարումը. նմանատիպ խափանումներ եղել են նաև ամռանը։

Մերձավոր Արևելքի և գլոբալ կարգի ուսումնասիրության կենտրոնը (CMEG) իր վերջին վերլուծական հաշվետվության՝ «Iran and Regional (In-)Stability & Security Briefing (IRIS)»-ում, եզրակացնում է, որ Իրանում ջրային ռեսուրսների ճգնաժամը ոչ միայն սպառնում է ջրամբարներին, այլև «փլուզում է երկրի ջրաճահճային տարածքները և սպառում է ստորգետնյա ջրատար շերտերը»։

Բացի այդ, ոչ մի նշան չկա, որ «իրանական ղեկավարությունը մտադիր է փոխել իր ընթացքը» և ներդրումներ կատարել ենթակառուցվածքներում, ուստի, փորձագետների գնահատմամբ, իրավիճակը «կշարունակի վատթարանալ»։ Հաշվետվությունն ընդգծում է, որ նախկինում «էկոլոգիական ճգնաժամը հաճախ դարձել է քաղաքական բողոքների պատճառ ռեժիմի և նրա իշխանությունների դեմ»։ Հետևաբար, ջրային իրավիճակը, հնարավոր է, ունենա նաև քաղաքական հետևանքներ։