Պոկրովսկը՝ կործանման եզրին․ Ուկրաինան զինվորականների աղետալի պակաս ունի

Ուկրաինական Պոկրովսկ քաղաքի և հարակից Միրնոգրադի շուրջ իրավիճակը կտրուկ սրվել է՝ հասնելով կրիտիկական մակարդակի։ Ուկրաինացի զինվորականներն ու միջազգային վերլուծաբանները ահազանգում են ՈւԶՈւ-ում մարդկային ռեսուրսների խիստ պակասի մասին, ինչը կարող է հանգեցնել Բախմուտի և Ավդիևկայի ողբերգական սցենարների կրկնությանը։ Ռուսական զորքերի առաջխաղացումը սպառնում է ռազմավարական կարևորության քաղաքը վերածել նոր հարձակման հենակետի, գրում է Financial Times-ը։

Ըստ Ուկրաինայի զինված ուժերի տվյալների՝ Պոկրովսկում ներկայումս գտնվում է ավելի քան 300 ռուս զինվորական։ Նրանց հիմնական նպատակն է դուրս գալ քաղաքի հյուսիսային սահմաններ՝ ռազմավարական նշանակության ագլոմերացիան ամբողջությամբ շրջափակելու համար։ Ուկրաինական Դեսանտա-գրոհային զորքերի 7-րդ կորպուսում նշում են, որ ռուսական ուժերը թեթև տեխնիկայով քաղաք ներթափանցելու համար հմտորեն օգտագործել են անբարենպաստ եղանակային պայմանները՝ մասնավորապես խիտ մառախուղը։ Սա զգալիորեն նվազեցրել է ուկրաինական օդային հետախուզության արդյունավետությունը և բարդացրել բաց տեղանքում նրանց հարվածներ հասցնելու հնարավորությունը։

Իրավիճակի սրության մասին վկայում են ոչ միայն ռազմի դաշտից ստացվող տեղեկությունները, այլև փորձագետների ու կամավորների տագնապալի հայտարարությունները։ Պաշտպանության նախկին փոխնախարար և «Վերադարձիր կենդանի» հիմնադրամի ղեկավար Վիտալի Դեյնեգան նոյեմբերի 4-ին կոչ է արել․ «Չնայած պաշտոնական հավաստիացումներին՝ իրավիճակն ավելի քան բարդ է և անվերահսկելի։ Պետք է դուրս գալ այս քաղաքներից, քանի դեռ դա հնարավոր է»։

Վերլուծաբանները նշում են, որ ուկրաինական ուժերի խտությունը ճակատի երկայնքով հասել է կրիտիկական ցածր մակարդակի՝ մեկ կիլոմետրի վրա ընդամենը չորսից յոթ հետևակային։ Իրավիճակը խորացնում է դասալքության աճող մակարդակը։ Հոկտեմբերին դատախազությունը գրանցել է ինքնակամ հեռանալու և դասալքության շուրջ 20 հազար գործ, ինչը տարվա ամենաբարձր ցուցանիշն է։

Լեհական Rochan Consulting խմբի տնօրեն Կոնրադ Մուզիկայի խոսքով՝ «արդյունքում ցամաքային զորքերը ոչ թե ընդլայնվում են, այլ իրականում թվաքանակով կրճատվում են»։ Նա հավելում է, որ «ուկրաինական ուժերի խտությունն այնքան ցածր է, որ կան ճակատային գծի հատվածներ, որոնք փաստացիորեն պաշտպանվում են միայն անօդաչու թռչող սարքերով»։

Չնայած այս ամենին, ուկրաինական ղեկավարությունը փորձում է հանգստացնել հանրությանը։ Գլխավոր հրամանատար Ալեքսանդր Սիրսկին հեռուստատեսությամբ հայտարարել է, թե իրավիճակը «ընդհանուր առմամբ վերահսկելի է», իսկ գրոհների ինտենսիվությունը քաղաքում նվազել է։ Նախագահ Վլադիմիր Զելենսկին հայտնել է, որ քաղաք է ներթափանցել 314 ռուս զինվոր (նախկինում նա նշում էր մոտ 200)։ Սակայն այս հավաստիացումների ֆոնին DeepState վերլուծական խումբը նախազգուշացնում է, որ Միրնոգրադը «գտնվում է օպերատիվ շրջափակման վտանգի տակ», քանի որ ռուսական ուժերի առաջխաղացումը թույլ է տալիս նրանց տեղակայել ԱԹՍ-ների մասնագիտացված հարվածային խմբեր, որոնք թուլացնում են ուկրաինական մատակարարման և տարհանման միջանցքները։

Պոկրովսկի ճգնաժամը տեղի է ունենում ռուսական զորքերի ընդհանուր առաջխաղացման ֆոնին։ DeepState-ը հայտնել է նաև երկու այլ բնակավայրերի՝ Դոնեցկի մարզի Կատերինովկայի և Զապորոժիեի մարզի Նովոնիկոլաևկայի գրավման մասին։ Ռուսական ուժերն առաջխաղացում ունեն ևս հինգ բնակավայրի մոտակայքում։

Վերլուծաբանները զգուշացնում են, որ եթե Կիևը պնդի Պոկրովսկը պահել ամեն գնով՝ առանց համապատասխան ուժեղացման, դա կարող է հանգեցնել քաոսային և արյունալի նահանջի, ինչպես դա տեղի ունեցավ այլ հենակետերում։

Կոնրադ Մուզիկան մտահոգություն է հայտնում․ «Եթե Պոկրովսկի համար մղվող ճակատամարտը պատշաճ կերպով չկազմակերպվի, դա կարող է ազդել զինված ուժերի ընկալման վրա։ Եթե մարդիկ տեսնեն նոր Բախմուտ կամ Ավդիևկա, նրանք միանալու խթան չեն ունենա, քանի որ կվախենան հայտնվել նույն իրավիճակում»։

Այժմ ուկրաինացի հրամանատարները կանգնած են բարդ ընտրության առաջ՝ սահմանափակ ուժերով պահպանել քաղաքները՝ ռիսկի ենթարկելով զորքերին, թե՞ նահանջել՝ կենդանի ուժը պահպանելու և պաշտպանությունն այլ կրիտիկական հատվածներում կենտրոնացնելու համար։ Այս ընտրությունից է կախված ոչ միայն տեղական մարտավարական իրավիճակը, այլև ուկրաինական ուժերի ավելի լայն ռազմավարական կայունությունն արևելքում։