Թբիլիսիում բախումներ են տեղի ունեցել Կալաձեի շտաբի մոտ

Թբիլիսիում կոշտ բախումներ են տեղի ունեցել եվրոպամետ բողոքի ակցիայի մասնակիցների և իշխող «Վրացական երազանք» կուսակցության երիտասարդական թևի ներկայացուցիչների միջև:

Մի քանի միջադեպ է եղել գործող քաղաքապետ Կախա Կալաձեի նախընտրական շտաբի մոտ կազմակերպված ակցիայի ժամանակ։ Իշխող կուսակցությունը նրան կրկին առաջադրել է որպես թեկնածու հոկտեմբերի 4-ին կայանալիք ՏԻՄ ընտրություններում:

Բախումները սկսվել են բանավոր վիրավորանքներից և վերածվել ֆիզիկական բռնության: Ոստիկանությունը շրջափակել է Կալաձեի շտաբը: Ցուցարարները շարունակել են «Դուք ռուսների ստրուկներ եք» վանկարկել՝ ուղղված իշխող կուսակցության կողմնակիցներին։

Իրավիճակը Թբիլիսիում սրվել էր սեպտեմբերի 8-ի երեկոյան։ Կալաձեի շտաբի մոտ տեղի է ունեցել մեծածավալ բողոքի ակցիա, որի ժամանակ միջադեպեր են գրանցվել: Դեպքի վայրից ստացված բազմաթիվ տեսանյութերում երևում է, թե ինչպես են «Վրացական երազանք» կուսակցության երիտասարդական թևի ներկայացուցիչները հարձակվել եվրոպամետ հանրահավաքի մասնակիցների վրա:

Բողոքի ակցիայի մասնակիցների խոսքով՝ նրանց ձեռքերում եղել են ռետինե մահակներ, իսկ ոմանք մետաղյա արգելապատնեշներ են նետել ցուցարարների վրա: Ինչպես նախորդ օրերին, կուսակցության ներկայացուցիչները, ներառյալ շտաբի աշխատակիցները, բացահայտորեն վիրավորել են խաղաղ ակցիայի մասնակիցներին՝ կանգնած շտաբի դռների մոտ:

Ներքին գործերի նախարարությունը հայտարարել է, որ ոստիկանությունը կարողացել է սկզբնական փուլում կանխել Կալաձեի նախընտրական շտաբի մոտ ակցիայի մասնակիցների միջև իրավիճակի թեժացումը:

Հայտարարվել է, որ սկսվել է հետաքննություն՝ Վրաստանի Հանրապետության Քրեական օրենսգրքի 126-րդ հոդվածի 1-ին մասով՝ «խմբով բռնություն կիրառելու» մեղադրանքով: ՆԳՆ-ն կոչ է արել բոլոր ակցիաների մասնակիցներին իրենց դիրքորոշումն արտահայտել օրենքով սահմանված կարգով՝ զգուշացնելով, որ հակառակ դեպքում ոստիկանությունը միջոցներ կձեռնարկի:

Publica հրատարակությունը բողոքի հայտարարություն է տարածել՝ կապված Կալաձեի նախընտրական շտաբի մոտ տեղի ունեցած բախումների հետ: Բողոքի հեղինակները պնդում են, որ «Վրացական երազանք» կուսակցության ներկայացուցիչները հարձակվել են հրատարակության երկու լրագրողների՝ Ալեքսանդր Քեշելաշվիլիի և Քեթո Միկաձեի վրա և խլել նրանց հեռախոսները:

Վրաստանի մայրաքաղաքում չեն բացառվում նոր բախումները։ Սեպտեմբերի 9-ին, երեկոյան, Թբիլիսիի Մելիքիշվիլի պողոտայում՝ քաղաքապետ Կախա Կալաձեի նախընտրական շտաբի մոտ, հայտարարվել է հանրահավաք:

Հիշեցնենք, որ վրացական ընդդիմության մեծ մասը բոյկոտում է հոկտեմբերի 4-ին կայանալիք ընտրությունները՝ հայտարարելով իշխանությունների անօրինականության մասին և պահանջելով նոր խորհրդարանական ընտրություններ: Մունիցիպալ ընտրություններին մասնակցելու մասին հայտարարել են միայն երեք ընդդիմադիր քաղաքական ուժեր՝ «Լելո-Ուժեղ Վրաստան», «Գախարիա Վրաստանի համար» և «Գիրչի»: