Նյու Ջերսիում արտակարգ դրություն է «Էրին» փոթորկի պատճառով

ԱՄՆ Նյու Ջերսի նահանգում արտակարգ դրություն է հայտարարվել՝ «Էրին» փոթորիկի մոտենալու պատճառով: Այս մասին հայտնում է տարածաշրջանի կառավարության կայքը:

ԱՄՆ-ի Փոթորիկների դիտարկման ազգային կենտրոնի տվյալներով՝ «Էրին»-ը դասակարգվում է որպես երկրորդ կարգի փոթորիկ՝ Սաֆիր-Սիմպսոնի սանդղակով: Ներկայումս եղանակային երևույթի ներսում քամու արագությունը կազմում է 40 մ/վ: Փոթորիկը շարժվում է դեպի հյուսիս՝ ԱՄՆ-ի արևելյան ափի երկայնքով:

Ավելի վաղ Հյուսիսային Կարոլինա նահանգի իշխանությունները նույնպես արտակարգ դրություն էին հայտարարել: Փոթորիկը տարածաշրջան է բերել մեծ ալիքներ, հորդառատ անձրևներ և հանգեցրել ջրհեղեղների:

Ափամերձ որոշ շրջաններում իրականացվել է տարհանում: Նմանատիպ հետևանքներ են ակնկալվում նաև Նյու Ջերսիում փոթորիկի անցման ժամանակ: Ներկայումս նահանգի տարածքում փակվել են լողափերը: Նշվում է, որ դրանք կփակվեն նաև հարևան Նյու Յորք նահանգում:

Ատլանտյան օվկիանոսում փոթորիկների սեզոնը սովորաբար տևում է կես տարի՝ հունիսի սկզբից մինչև նոյեմբերի վերջ: Մթնոլորտային երևույթը դասակարգվում է որպես արևադարձային փոթորիկ և ստանում է անուն, եթե քամու արագությունը նրա սահմաններում հասնում է 17,5 մ/վ-ի: 33 մ/վ և ավելի արագության դեպքում փոթորիկը համարվում է մրրիկ: