Ստարմեր–Թրամփ հանդիպում. 150 միլիարդ Լոնդոնի համար

Թագավորական ընտանիքի ընդունելությունից հետո, սեպտեմբերի 18-ին կայացել է ՄԹ ժամանած ԱՄՆ նախագահ Դոնալդ Թրամփի հանդիպումը բրիտանական վարչապետի հետ։ Քիր Ստարմերը ասել է, որ Թրամփի հետ քննարկել է, թե ինչպես ավելի շատ աջակցել Ուկրաինային և ճնշում գործադրել Պուտինի վրա։

Թրամփը ևս Պուտինից դժգոհել է, բայց ոչ այնքան խիստ, որքան կցանկանային եվրոպական առաջնորդները։ ԱՄՆ նախագահը հայտարարել է, որ Պուտինը հիասթափեցրել է իրեն։ Թրամփը կրկին հիշել է, որ իրեն հաջողվել է կարգավորել «յոթ պատերազմները», հայտնում է Sky News-ը: Սակայն, նրա խոսքով, Ռուսաստանի Ուկրաինայի դեմ պատերազմը, որը նա համարում էր «ամենահեշտը» կարգավորելիքը՝ իր Պուտինի հետ հարաբերությունների պատճառով, ավելի բարդ է եղել: «Նա [Պուտինը] հիասթափեցրել է ինձ: Նա իսկապես հիասթափեցրել է ինձ... Նայենք, թե ինչ կլինի»,- ասել է Թրամփը:

Փորձագետները Ստարմեր-Թրամփ հանդիպմանը հաջորդած համատեղ հայտարարություններից այլ մանրամասներ ևս առանձնացրել են։ Ըստ այդմ, Ստարմերը խոսել է մաքսատուրքերի և ներդրումների մասին ընդամենը հինգ րոպե, մինչդեռ Թրամփը տասնհինգ րոպե խոսել է ԱՄՆ-ի և Մեծ Բրիտանիայի միջև «անսասան բարեկամության» մասին: Դիտորդների կարծիքով՝ բրիտանական կառավարության ղեկավարը ամեն ինչ արել է, որպեսզի չհարուցի ամերիկացի նախագահի դժգոհությունը: Արտաքին քաղաքական օրակարգից ավելի շատ՝ կողմերն իրենց ուշադրությունը կենտրոնացրել են ֆինանսական հարցերի վրա: Հանդիպման ժամանակ հայտարարվել է Մեծ Բրիտանիայում 150 միլիարդ ֆունտ ստեռլինգ արժեքով ամերիկյան ներդրումների փաթեթի մասին:

Միևնույն ժամանակ, հանրային մասում բրիտանական վարչապետին չի հաջողվել Թրամփից ստանալ ո՛չ ԱՄՆ-ի կոշտ դիրքորոշում Ռուսաստանի վերաբերյալ, ո՛չ էլ կոնկրետություն Ուկրաինայի հարցում: