ԱՄՆ նախագահը կշարունակի խաղաղության համաձայնագրեր կնքել․ Սպիտակ տուն

Սպիտակ տունը հայտարարել է, որ նախագահ Դոնալդ Թրամփը կշարունակի «խաղաղության համաձայնագրեր կնքել» և կարգավորել ռազմական հակամարտությունները՝ չնայած այն հանգամանքին, որ այս տարի Խաղաղության Նոբելյան մրցանակը նրան չի շնորհվել։

Չնայած Իսրայելի և «ՀԱՄԱՍ»-ի միջև պատմական գործարքի կնքմանը, Թրամփի թեկնածությունը չի կարողացել դիտարկվել 2025 թվականի մրցանակի համար։ New York Post պարբերականը գրում է, որ Նոբելյան կոմիտեն իր որոշումը կայացրել էր գործարքի կնքումից երկու օր առաջ, իսկ մրցանակը շնորհվել է վենեսուելացի ընդդիմադիր գործիչ Մարիա Կորինա Մաչադոյին։ «Թրամփի գործարքը չէր կարող հաշվի առնվել դափնեկրի ընտրության ժամանակ»,- նշում է հրատարակությունը։

«Նոբելյան կոմիտեն ապացուցեց, որ քաղաքականությունը խաղաղությունից վեր է դասում»,- X-ում գրել է Սպիտակ տան խոսնակ Սթիվեն Չունգը։

Այնուամենայնիվ, New York Post-ի գնահատմամբ, Թրամփի շանսերը հաջորդ Նոբելյան մրցանակաբաշխության համար «ավելի համոզիչ են թվում»։ Այս տեսակետը կիսում են նաև Թրամփի շրջապատում։ Նրանք կարծում են, որ ապագայում մրցանակը ստանալու նրա հնարավորությունները մնում են բարձր, հատկապես եթե Մերձավոր Արևելքում սկսված խաղաղ գործընթացը պահպանվի և տա երկարաժամկետ արդյունքներ։ Սպիտակ տան խոսնակն ընդգծում է, որ վարչակազմի խաղաղարար ջանքերը կշարունակվեն՝ անկախ Նոբելյան կոմիտեի որոշումներից։