Միջազգային սկանդալ․ Ասադի գեներալը՝ «Մոսադի» գործակալ կամ հակառակը

Սիրիացի նախկին գեներալ Խալեդ ալ-Հալաբիի պատմությունը վերածվել է մայրցամաքային մասշտաբի քաղաքական թրիլլերի։ Ավստրիան նրան պաշտոնապես մեղադրանք է առաջադրել ռազմական հանցագործությունների և խոշտանգումների համար, սակայն իսկական սկանդալը սկսվեց այն բանից հետո, երբ քննիչները հայտարարեցին, որ այս տարիների ընթացքում սիրիացի գեներալը գտնվել է իսրայելական «Մոսադի» պաշտպանության ներքո և օգտվել Եվրոպայի մի շարք հատուկ ծառայությունների հովանավորությունից:

62-ամյա Խալեդ ալ-Հալաբին, որը ղեկավարել է Սիրիայի պետական անվտանգության ծառայության 335-րդ բաժանմունքը Ռաքքա քաղաքում, մեղադրվում է 2011-2013 թվականներին «Արաբական գարնան» բողոքի ցույցերը ճնշելու ժամանակ առնվազն 21 անձի նկատմամբ խոշտանգումների մեջ ներգրավված լինելու մեջ: Նրա ղեկավարած բաժանմունքը հայտնի էր իր դաժան մեթոդներով՝ բանտեր, որտեղ մարդիկ անհետանում էին առանց հետքի, արտադատական մահապատիժներ և հարցաքննություններ, որոնք վերածվում էին ամենախիստ խոշտանգումների:

Սակայն դա թեմայի դեռ մի մասն է։ Իրական սենսացիան այն է, որ, ըստ ավստրիական դատախազության, գեներալը ոչ թե պարզապես փախստական էր, այլ իսրայելական արտաքին հետախուզության՝ «Մոսադի» գաղտնի գործակալ, որը գործում էր Եվրոպայում: Քննությունը պնդում է, որ 2015 թվականին հենց իսրայելցի սպաներն են ապահովել ալ-Հալաբիի գաղտնի տեղափոխումը Ֆրանսիայից Ավստրիա, երբ ֆրանսիական իշխանությունները սկսել էին զանգվածաբար ստուգել ապաստան հայցողներին՝ Բաշար ալ-Ասադի ռեժիմի հանցագործություններին մասնակցություն ունենալու վերաբերյալ:

Դատախազների խոսքով՝ «Մոսադի» գործակալներն ուղեկցել են նրան մինչև սահման, իսկ ավստրիացի հետախույզները, որոնցից ոմանք գործել են սեփական նախաձեռնությամբ, օգնել են սիրիացի գեներալին ապաստան ստանալ, փաստաթղթեր ձևակերպել և թաքնվել Վիեննայի մասնավոր բնակարաններից մեկում, որը վարձակալվել էր կրկին «Մոսադի» միջոցներով:

Տարիներ անց, մասամբ հենց ալ-Հալաբիի անզգուշության պատճառով, քննիչներին հաջողվեց դուրս գալ գեներալի հետքի վրա։ Նա սոցցանցերում լուսանկար էր հրապարակել Բուդապեշտի կամուրջներից մեկի վրա: Ալ-Հալաբիի արած լուսանկարը դարձավ այն բանալին, որը թույլ տվեց համադրել տեղաշարժման երթուղիները և վերսկսել փախուստի դիմած գեներալի որոնումները: Փաստացի, մի քանի երկրի հատուկ ծառայություններին հաջողությամբ շրջանցած հին ու փորձված գործակալը բացահայտվեց ընդամենը մեկ լուսանկարի պատճառով։