Պատերազմի զեկույցի քննարկման իրավական հիմք չկա․ Ալեն Սիմոնյան

Ազգային ժողովի նախագահ Ալեն Սիմոնյանը հայտարարել է, որ 44-օրյա պատերազմի հանգամանքներն ուսումնասիրող քննիչ հանձնաժողովի զեկույցը խորհրդարանի լիագումար նիստի օրակարգ մտցնելու համար իրավական հիմքեր չկան։ Այս հայտարարությունը ստեղծում է լարվածություն իշխող խմբակցության ներսում, քանի որ զեկույցը ներկայացվել է Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի կողմից, որը ևս նույն խմբակցությունից է։

ԱԺ նախագահը, լրագրողների հետ զրույցում անդրադառնալով մամուլում տեղ գտած հրապարակումներին, թե ինքը հրաժարվում է օրակարգ ընդգրկել Քոչարյանի ուղարկած փաստաթուղթը, հակադարձել է «ԱԺ կանոնակարգ» օրենքի դրույթներով։ Ըստ Սիմոնյանի՝ գործող օրենսդրությունը նման ընթացակարգ չի նախատեսում քննիչ հանձնաժողովների զեկույցների համար։

Հարցին, թե արդյոք Անդրանիկ Քոչարյանը տեղյակ չէ կանոնակարգի պահանջներից, Ալեն Սիմոնյանը պատասխանել է, որ խնդիրը ոչ թե անտեղյակության, այլ մեկնաբանության մեջ է։ «Գիտի, մեկնաբանության խնդիր է։ Ինքն այլ կերպ է փորձում մեկնաբանել», - նշել է նա։ ԱԺ նախագահը հավելել է, որ «ԱԺ կանոնակարգ» օրենքի մեկնաբանման բացառիկ իրավասությունը պատկանում է Պետաիրավական հարցերի մշտական հանձնաժողովին։ Տեղեկացրել է, որ ինքը դիմել է, ստացել պատասխան և գործում է այդ պատասխանի տրամաբանության մեջ։

Չնայած լիագումար նիստում զեկույցի քննարկման շուրջ ստեղծված անորոշությանը՝ Ալեն Սիմոնյանը վստահեցրել է, որ զեկույցն անպայման հանրությանը հասանելի կդառնա։ «Զեկույցը հրապարակվելու է, չի կարող հակառակը լինել», - ընդգծել է նա՝ միևնույն ժամանակ նշելով, որ դեռևս հայտնի չէ, թե ինչ ձևաչափով դա տեղի կունենա։ Ակնարկել է, որ դա կարող է տեղի ունենալ լսումների, քննարկումների կամ որևէ այլ ձևաչափով։ Սակայն վերջնական որոշում դեռ չկա։