Բաքվում 23 հաստատված գերի կա, բոլորը վերադառնալու են․ Ալեն Սիմոնյան

Մենք ունեցել ենք մինչև 200 գերի։ Հիմա՝ այսօր, կա 23 հաստատված գերի։ Այդ մասին հայտարարել է ԱԺ նախագահ Ալեն Սիմոնյանը՝ ճեպազրույցի ժամանակ։

«Եկեք սպասենք, և ես վստահ եմ, որ այս քայլերի շնորհիվ այդ գերիների թիվը գալու է հասնի զրոյի, և բոլորը վերադառնալու են»,- նշել է ԱԺ նախագահը։

Հիշեցրել ու վերահաստատել է, որ Հայաստանի իշխանությունները հետևողականորեն շարունակում են աշխատանքները Բաքվի բանտերում պահվող բոլոր հայրենակիցների վերադարձն ապահովելու ուղղությամբ։ Ալեն Սիմոնյանը վստահություն է հայտնել, որ գործադրվող ջանքերը անպայման տալու են իրենց արդյունքը։ Սիմոնյանը հատուկ շեշտադրում է կատարել նաև Արցախի նախկին ռազմաքաղաքական ղեկավարության վրա, որոնք այսօր ևս գտնվում են ադրբեջանական բանտերում։ Ըստ պաշտոնյայի՝ վերադարձի գործընթացը վերաբերելու է բոլորին՝ առանց բացառության։

Նա ընդգծել է. «Վերադառնալու են նաև Ղարաբաղի այն ժամանակվա ղեկավարները, վերադառնալու են բոլոր այն մարդիկ, ովքեր գերեվարվել են և այսօր գտնվում են այնտեղի բանտերում։ Մեր իշխանությունը ամեն ինչ արել է և անելու է, որպեսզի բոլորը անխտիր վերադառնան Հայաստանի Հանրապետություն»։

Խոսելով իր լավատեսության հիմքերի մասին՝ Ալեն Սիմոնյանը պարզաբանել է, որ իր վստահությունը խարսխված է նախկինում կատարված աշխատանքի շոշափելի արդյունքների և ներկայումս տարվող գործընթացների վրա։ Նա մատնանշել է թվային տվյալների էական նվազումը որպես ապացույց այն բանի, որ իշխանության քայլերն արդյունավետ են։ Սիմոնյանը շեշտել է՝ գերիների վերադարձի հարցով զբաղվում են պետական բարձրագույն օղակները։