Թրամփը նվազեցնում է ԱՄՆ-ի հզորությունը՝ միավորելով ընկերներին և թշնամիներին

The Washington Post-ում վերջերս հրապարակված հոդվածում Մաքս Բութը՝ Արտաքին հարաբերությունների խորհրդի հետազոտական կենտրոնի արտաքին քաղաքականության վերլուծաբանը, ասել է, որ Թրամփը «նվազեցնում է ԱՄՆ հզորությունը՝ անհեթեթորեն միավորելով Ամերիկայի ընկերներին մեր թշնամիների հետ»։

Որպես օրինակ էլ նշում է այն, թե ինչպես են Բրազիլիան, Հարավային Աֆրիկան և Հնդկաստանը ավելի սերտորեն դաշնակցում Չինաստանի և Ռուսաստանի հետ։ BRICS-ի անդամների աճող համերաշխության հետագա դրսևորումը կցուցադրվի Շանհայի համագործակցության կազմակերպության գագաթնաժողովում Տյանցզինում, հյուսիսային Չինաստանում, որը սկսվում է կիրակի։ Չինաստանի նախագահ Սի Ծինփինը կընդունի իր հնդիկ և ռուս գործընկերներին՝ Նարենդրա Մոդիին և Վլադիմիր Պուտինին, ինչպես նաև առաջնորդներին շուրջ 20 այլ երկրներից՝ Գլոբալ Հարավից։ Սա կլինի Մոդիի առաջին այցը չինական հող՝ յոթ տարվա ընթացքում։

Գագաթնաժողովից առաջ Կրեմլը փորձում է նախաձեռնել Չինաստանի, Ռուսաստանի և Հնդկաստանի միջև եռակողմ բանակցությունների անցկացումը վեց տարվա ընդմիջումից հետո՝ նպատակ ունենալով ամրապնդել BRICS դաշինքի միջուկը։Մոսկվան կարծում է, որ BRICS-ի երեք խոշորագույն անդամների միջև բարձր մակարդակի երկխոսության վերականգնումը կարող է օգնել հանգստացնել երկարատև լարվածությունը, հատկապես Հնդկաստանի և Չինաստանի միջև, և ներկայացնել ավելի միասնական հակակշիռ Արևմուտքին։

Հնդկաստանն ու Չինաստանը նաև տնտեսական լուրջ խթաններ ունեն՝ համագործակցության համար։ Թրամփի հսկայական մաքսատուրքերը ստիպել են Նյու Դելիին ամրապնդել տնտեսական կապերը Չինաստանի հետ՝ վերսկսելով ուղիղ թռիչքները, մեղմելով վիզային սահմանափակումները և ավելացնելով առևտրային քննարկումները։

Երկու երկրները նաև բանակցություններ են վարել իրենց գրեթե 3500 կիլոմետր փաստացի սահմանի երկայնքով երկարատև վեճերը լուծելու համար։

Չինաստանի արտգործնախարար Վանգ Յիի՝ անցյալ շաբաթ Հնդկաստան կատարած այցի ընթացքում Պեկինը համաձայնել է ավելացնել հազվագյուտ հողային միներալների մատակարարումները Հարավային Ասիայի երկիր։ Չինաստանը վերահսկում է հազվագյուտ հողային մշակման գլոբալ 85%-ից ավելին, մինչդեռ Հնդկաստանին հրատապ անհրաժեշտ են այդ միներալները մաքուր էներգիայի, էլեկտրական մեքենաների և պաշտպանական տեխնոլոգիաների համար։

Դա, սակայն, չի նշանակում, թե կողմերը հակասություններ չունեն։ Հնդկաստանն ու Չինաստանը լուրջ անհամաձայնություններ ունեն և քաղաքական, և տնտեսական հարցերում, բայց Վաշինգտոնի աճող ճնշումները նրանց ստիպում է դրանք առայժմ երկրորդ պլանում պահել։