Գիշերը Կիևի վրա ռուսական հարձակման հետևանքով զոհվել է 8 մարդ

28 ՕԳՍ 2025 05:46

Օգոստոսի 27-ի լույս 28-ի գիշերը ռուսական ուժերը ձեռնարկել են լայնածավալ հարձակում Ուկրաինայի մայրաքաղաք Կիևի վրա՝ օգտագործելով անօդաչու թռչող սարքեր, հիմնականում՝ «Shahed» տեսակի, բալիստիկ և հեռահար հրթիռներ:

Հարձակումը սկսվել է ուշ երեկոյան և շարունակվել է մինչև առավոտ՝ առաջացնելով բազմաթիվ պայթյուններ քաղաքի տարբեր թաղամասերում: Ուկրաինայի օդային պաշտպանության համակարգերը գործարկվել են, սակայն հարձակումը հանգեցրել է զգալի վնասների և մարդկային կորուստների։ Կիևում հայտնի է առնվազն 8 զոհի մասին, որոնց թվում է մեկ երեխա, - հայտարարել է Զելենսկին:

Զոհերի մի մասի ինքնությունը դեռ չի հաջողվել պարզել։ Ուկրաինայի ՆԳ նախարարի խոսքով՝ առջևում սպասվում է զոհերի նույնականացման բարդ գործընթաց: Քաղաքապետ Վիտալի Կլիչկոն հայտնել է, որ գիշերային հարձակման հետևանքով վիրավորվել է 38 մարդ, որոնցից 30-ը գտնվում են հիվանդանոցներում: Վիրավորների թվում առնվազն 5 երեխա կա:

Վնասվել են բնակելի շենքեր։ Հարվածի են ենթարկվել մանկապարտեզ, մասնավոր տուն, ավտոկայանատեղի և բազմաթիվ մեքենաներ: Վնասվածքներ է ստացել առնվազն 20 օբյեկտ՝ քաղաքի 7 թաղամասում: Առաջացել են հրդեհներ, որոնք մարվել են փրկարարների և նույնիսկ ավիացիայի օգնությամբ:

Առաջարկվող հոդվածներ

Մուտք գործեք կամ ստեղծեք անվճար ReOpen Media հաշիվ՝ մեկնաբանություններ տեղադրելու համարԳրանցվել