Ռուսական բանակի հարձակումից ամենից շատ տուժել է Խարկովը

Սեպտեմբերի 30-ի լույս հոկտեմբերի 1-ի գիշերը Ուկրաինայի մի շարք մարզեր ենթարկվել են ռուսական զորքերի համակցված հարձակմանը։ Դրա ընթացքում կիրառվել են անօդաչու թռչող սարքեր և տարբեր տեսակի հրթիռներ։ Պայթյուններ են գրանցվել Խարկովի, Օդեսայի և Սումիի մարզերում, սակայն ամենածանր հարվածը կրել է Խարկով քաղաքը և հարակից շրջանները։

Գիշերվա ընթացքում Խարկովը, նրա արվարձանները և Չուգուևի շրջանը ենթարկվել են կառավարվող ավիառումբերով և հրթիռներով զանգվածային հարձակման։ Հարվածների հետևանքով քաղաքի Կիևյան և Սալտովյան շրջաններում լուրջ ավերածություններ և հրդեհներ են բռնկվել։

Կիևյան շրջանում կրակի մատնվել են շուրջ 2800 քառակուսի մետր տարածք զբաղեցնող առևտրային տաղավարներ, որոնք, ըստ որոշ տեղեկությունների, գտնվում են «Բարաբաշովո» շուկայի տարածքում։ Սալտովյան շրջանում հարվածի հետևանքով փլուզվել է բնակելի շենք, ինչին հաջորդել է հրդեհ։ Այրվել և ավերվել են նաև ավտոտնակներ՝ մոտ 350 քառակուսի մետր ընդհանուր մակերեսով։

Նախնական տվյալներով՝ հարձակման հետևանքով տուժել է առնվազն հինգ մարդ, թեև այլ աղբյուրներ հայտնում են վեց տուժածի մասին, որոնցից մեկը ոստիկանության աշխատակից է։ Տուժածները, այդ թվում՝ 80-ամյա մի կին, ստացել են բեկորային վնասվածքներ և տեղափոխվել հիվանդանոց։

Դեպքի վայրում աշխատում են Արտակարգ իրավիճակների պետական ծառայության ստորաբաժանումները, սակրավորներ, հոգեբաններ, կինոլոգներ և կամավոր հրշեջներ։ Հրդեհները հաջողվել է մեկուսացնել, շարունակվում են հետևանքների վերացման աշխատանքները։

ԶԼՄ-ները հաղորդում են նաև Դնեպր քաղաքում զանգերի կենտրոնների վրա հասցված հարվածի մասին։ Ըստ ռուսական աղբյուրների՝ այդ կենտրոնները զբաղվել են Ռուսաստանի քաղաքացիներից գումարներ շորթելով։ Այս տեղեկությունը դեռևս պաշտոնական հաստատում չի ստացել ուկրաինական կողմից։ Պայթյուններ են լսվել նաև Օդեսայի և Սումիի մարզերում, սակայն դրանց հետևանքների մասին մանրամասներ առայժմ չեն հաղորդվում։