ՌԴ-ն պատրաստ է շարունակել միջնորդությունը Հայաստանի և Ադրբեջանի միջև․ Գալուզին

Ռուսաստանի Դաշնությունը վերահաստատում է իր պատրաստակամությունը՝ շարունակելու ակտիվ միջնորդական դերակատարումը հայ-ադրբեջանական հարաբերությունների կարգավորման գործընթացում։ Մոսկվան հիշեցնում է, որ Հայաստանի և Ադրբեջանի միջև խաղաղության համապարփակ համաձայնագրի ստորագրման համար հարթակ տրամադրելու իր առաջարկը շարունակում է մնալ ուժի մեջ։ Այս մասին, ինչպես հաղորդում է «ՌԻԱ Նովոստին», հայտարարել է ՌԴ արտաքին գործերի նախարարի տեղակալ Միխայիլ Գալուզինը։

Հայաստանի Անկախության օրվան նվիրված ընդունելության ժամանակ ունեցած ելույթում ռուս բարձրաստիճան դիվանագետը առանձնահատուկ շեշտել է, որ ռուսական կողմը մեծ կարևորություն է տալիս Երևանի և Բաքվի միջև հարաբերությունների ամբողջական կարգավորմանը։ «Ակնհայտ է, որ դեռևս անհրաժեշտ է լուրջ աշխատանք կատարել նախատեսվածը գործնականում իրագործելու համար։ Մենք պատրաստ ենք Երևանին և Բաքվին ցուցաբերել ողջ անհրաժեշտ աջակցությունը՝ մնացյալ տարաձայնությունները հաղթահարելու հարցում»,- նշել է Գալուզինը։

Նախարարի տեղակալը նաև ընդգծել է, որ Ռուսաստանի աջակցությունը հիմնված է լինելու Ռուսաստանի, Հայաստանի և Ադրբեջանի ղեկավարների միջև ստորագրված եռակողմ հայտարարությունների դրույթների վրա։ Գալուզինի խոսքով՝ Ռուսաստանը կարգավորման գործընթացում արդեն իսկ խաղացել է «մեծ և արդյունավետ դեր»։

ՌԴ-ում ՀՀ դեսպան Գուրգեն Արսենյանը բարձր է գնահատել ռուսական դիվանագիտության ջանքերը։ Նա Ռուսաստանի ներդրումը կարգավորման գործընթացում անվանել է «առանձնահատուկ»։