Ռուսաստանն անցկացրել է ռազմավարական միջուկային ուժերի զորավարժություն

22 ՀՈԿ 2025 16:24

Ռուսաստանի Դաշնությունը՝ նախագահ Վլադիմիր Պուտինի անմիջական ղեկավարությամբ, անցկացրել է ռազմավարական միջուկային ուժերի պլանային զորավարժություն։ Այս մասին հայտնել է Կրեմլի մամուլի ծառայությունը։ Այս տեղեկությունը ուշագրավ է հատկապես բուդապեշտյան գագաթնաժողովի եթե ոչ չեղարկումից, ապա առնվազն անորոշ ժամանակով հետաձգումից հետո։

Զորավարժության ընթացքում իրականացվել են միջմայրցամաքային բալիստիկ և օդային բազավորման թևավոր հրթիռների արձակումներ։ Մասնավորապես, «Պլեսեցկ» պետական փորձարարական տիեզերակայանից դեպի Կամչատկայում գտնվող «Կուրա» զորավարժարան արձակվել է «Յարս» միջմայրցամաքային բալիստիկ հրթիռ։

Միաժամանակ, Բարենցի ծովի ջրատարածքից «Բրյանսկ» ատոմային սուզանավից իրականացվել է «Սինևա» բալիստիկ հրթիռի արձակում։

ՌԴ Պաշտպանության նախարարությունը հրապարակել է այս արձակման տեսանյութը։

Զորավարժությանը ներգրավված են եղել նաև Ту-95МС հեռահար ավիացիայի ինքնաթիռներ, որոնք կատարել են օդային բազավորման թևավոր հրթիռների արձակումներ։

Կրեմլի հաղորդագրության համաձայն՝ գործնական արձակումների կառավարումն իրականացվել է Ռուսաստանի Դաշնության Պաշտպանության կառավարման ազգային կենտրոնից։

Ընդգծվում է, որ զորավարժության ընթացքում դրված բոլոր խնդիրներն ամբողջությամբ կատարվել են։

Առաջարկվող հոդվածներ

Մուտք գործեք կամ ստեղծեք անվճար ReOpen Media հաշիվ՝ մեկնաբանություններ տեղադրելու համարԳրանցվել