Ռուս-ուկրաինական պատերազմ. տեղի են ունեցել փոխադարձ հարվածներ

Ռուս-ուկրաինական հակամարտության գոտում իրավիճակը շարունակում է մնալ լարված։ Երկու կողմերն էլ հաղորդում են հակառակորդի թիրախներին հասցված հարվածների և դրա հետևանքների մասին։

Օդեսայի մարզում ռուսական կողմի հարձակումից հետո հզոր հրդեհ է բռնկվել Իզմայիլի նավահանգստում։ Տեղական աղբյուրների համաձայն՝ ընդհանուր առմամբ գրանցվել է 28 հարված նավի, բեռների և սարքավորումների մոտակայքում։ Ռուսական կողմը նշում է, որ այս հարվածները պատասխան են ռուսական օբյեկտների դեմ Ուկրաինայի զինված ուժերի «ահաբեկչական հարձակումներին»։

Իր հերթին, ուկրաինական կողմը, ըստ Դոնեցկի իշխանությունների, անօդաչու թռչող սարքերով հարվածներ է հասցրել էներգետիկ ենթակառուցվածքներին։ Դոնեցկի Ժողովրդական Հանրապետության ղեկավար Դենիս Պուշիլինի հայտարարության համաձայն՝ հարձակման հետևանքով Դոնեցկում, Մակեևկայում, Գորլովկայում և Յասինովատայում մոտ 500 հազար բաժանորդ մնացել է առանց էլեկտրականության։ Տեղական աղբյուրները հայտնում են, որ հարվածի թիրախ են դարձել «Չայկինո» ենթակայանը և Ստարոբեշևսկայա ՋԷԿ-ը։

Միևնույն ժամանակ, Ռուսաստանի Դաշնությունը հարված է հասցրել Խարկովի մարզի Բալակլեյա քաղաքին։ Քաղաքային ռազմական վարչակազմի տվյալներով՝ զոհվել է երեք մարդ, ևս տասը, այդ թվում՝ երեք երեխա, վիրավորվել են։ Սակայն Խարկովի մարզային ռազմական վարչակազմի ղեկավար Օլեգ Սինեգուբովը հայտնում է մեկ զոհի և ութ վիրավորի մասին։

ՌԴ պաշտպանության նախարարությունը հայտնել է, որ անցած գիշեր ոչնչացրել է Ուկրաինայի կողմից արձակված 36 անօդաչու թռչող սարք Բրյանսկի, Տամբովի, Ուլյանովսկի, Վորոնեժի, Օրյոլի, Նիժնի Նովգորոդի և Տուլայի մարզերում։ Ուլյանովսկի մարզում կանխվել է անօդաչու թռչող սարքի հարձակումը տեղի ենթակայանի վրա։ Մի շարք այլ մարզերում, ըստ տեղի իշխանությունների, զոհեր և ավերածություններ չկան։