Ռուս-ուկրաինական բախումները չեն թուլանում

Ուկրաինայում ռազմական գործողությունները շարունակվում են։ Ռուսական զորքերը որոշակի առաջխաղացում են գրանցել ցամաքում և շարունակել օդային հարվածները Ուկրաինայի մի շարք բնակավայրերի ուղղությամբ։ Ըստ Ուկրաինայի Զինված ուժերի Գլխավոր շտաբի, oգոստոսի 29-ի լույս 30-ի գիշերը ռուսական ուժերը կիրառել են 18 անօդաչու թռչող սարք և 4 հրթիռ՝ թիրախավորելով հիմնականում երկրի արևելյան և հարավային շրջանները։

Հարվածների հիմնական ուղղություններն են եղել Դոնեցկի մարզի Պոկրովսկի շրջանը և Խերսոնի մարզի որոշ բնակավայրեր։ Քաղաքացիական բնակչության շրջանում կորուստների մասին հստակ տվյալներ դեռևս չկան, սակայն նախնական տեղեկություններով, ըստ Unian-ի, Դոնեցկի մարզում տուժել է առնվազն 3 քաղաքացիական անձ՝ շենքերի վնասների հետևանքով։

Ցամաքում ռուսական զորքերը շարունակում են ակտիվ մարտական գործողությունները մի քանի ուղղություններում։ Ըստ ամերիկյան Պատերազմի ուսումնասիրության ինստիտուտի (ISW) և DeepState-ի տվյալների՝ ռուսական ուժերը օգոստոսի 29-ին առաջխաղացումներ են գրանցել Պոկրովսկի և Կուպյանսկի ուղղություններում՝ Նովոալեքսանդրովկա և Սինկովկա բնակավայրերի մոտ։ Չասով Յարի ուղղությամբ շարունակվում են ծանր մարտերը։

Ուկրաինական ուժերն էլ շարունակում են օդային հարվածները Ռուսաստանի ուղղությամբ։ Ռուսական կողմը հայտնել է, որ գիշերը խոցել կամ որսացել է 86 ուկրաինական դրոն, 30-ը՝ Սեւ ծովի վրա, 15-ը՝ Ղրիմի օդային տարածքում։