ՌԴ ուժերը հարվածել են Շոստկա-Կիև գնացքին․ տուժել է մոտ 30 մարդ

Ուկրաինայի Սումիի մարզի Շոստկա քաղաքում ռուսական ուժերը հարված են հասցրել երկաթուղային կայարանին՝ թիրախավորելով Շոստկա-Կիև ուղևորատար գնացքը։ Հարձակման հետևանքով, նախնական տվյալներով, տուժել է առնվազն 30 մարդ, այդ թվում՝ ուղևորներ և «Укрзалізниця» (Ուկրաինական երկաթուղի) ընկերության աշխատակիցներ։

Ուկրաինայի նախագահ Վոլոդիմիր Զելենսկին հրապարակել է հարվածի հետևանքները պատկերող կադրեր՝ ընդգծելով հարձակման դիտավորյալ և ահաբեկչական բնույթը։ Նա նշել է, որ ռուսական կողմը չէր կարող չիմանալ, որ հարվածում է քաղաքացիական օբյեկտի։

«Ռուսները չէին կարող չիմանալ, որ հարվածում են քաղաքացիական անձանց։ Եվ սա ահաբեկչություն է, որն աշխարհն իրավունք չունի անտեսելու։ Ամեն օր Ռուսաստանը մարդկային կյանքեր է խլում։ Եվ միայն ուժը կարող է ստիպել նրանց դադարեցնել դա», - հայտարարել է Զելենսկին։

Սումիի մարզային ռազմական վարչակազմի ղեկավար Օլեգ Գրիգորովը հաստատել է, որ հարվածի տակ է հայտնվել հենց ուղևորատար գնացքը։ Նրա խոսքով՝ այս պահին բոլոր տուժածներին ցուցաբերվում է անհրաժեշտ բժշկական օգնություն։ «Суспільне» հեռուստաընկերությունը, հղում անելով իր աղբյուրներին, հայտնում է մոտ 30 վիրավորի մասին։

Դեպքի վայրում աշխատում են փրկարարական ծառայությունները և իրավապահ մարմինները՝ պարզելու հարձակման բոլոր հանգամանքները և տուժածների վերջնական թիվը։ Այս հարձակումը դարձել է վերջին շրջանում Ուկրաինայի քաղաքացիական ենթակառուցվածքների դեմ իրականացված ամենաարյունալի գործողություններից մեկը՝ ևս մեկ անգամ ընդգծելով շարունակվող հակամարտության դաժանությունը։