Ռուսական զորքերը հարվածել են Ուկրաինայի արևմուտքի էներգահամակարգին

Ռուսական զինված ուժերը հզոր համակցված հարձակում են իրականացրել Ուկրաինայի տարբեր մարզերի վրա՝ թիրախավորելով հիմնականում էներգետիկ ենթակառուցվածքները։ Հարվածների համար օգտագործվել են «Կալիբր» տիպի թևավոր հրթիռներ, «Կինժալ» գերձայնային հրթիռներ, «Շահեդ» տիպի անօդաչու թռչող սարքեր։ Պայթյուններ են որոտացել Լվովի, Տերնոպոլի, Խմելնիցկիի, Իվանո-Ֆրանկովսկի, Օդեսայի, Կիևի, Դնեպրի և Նիկոլաևի մարզերում։

Տերնոպոլում, ըստ նախնական տվյալների, զոհվել է երկու մարդ։ Քաղաքապետ Սերգեյ Նադալի խոսքով՝ վնասվել են մի քանի բնակելի շենքեր, որոնց տեղում իրականացվում են փրկարարական աշխատանքներ։

Խարկովում անօդաչուների հարձակման հետևանքով տուժել է 46 մարդ, այդ թվում՝ 9 և 13 տարեկան երկու աղջիկ երեխա։ Մարզային ռազմական վարչակազմի ղեկավար Օլեգ Սինեգուբովի տեղեկացմամբ՝ վնասվել և ավերվել են քաղաքացիական ենթակառուցվածքի բազմաթիվ օբյեկտներ՝ 16 բազմաբնակարան շենք, 31 ավտոմեքենա, դպրոց, շտապօգնության ենթակայան, սուպերմարկետ, երկու տրոլեյբուս և վարչական շենքեր։

Իվանո-Ֆրանկովսկում թիրախավորվել են էներգետիկ օբյեկտներ։[6] Մարզային ռազմական վարչակազմի ղեկավար Սվետլանա Օնիշչուկի հաղորդմամբ՝ կա երեք տուժած, որոնցից երկուսը երեխաներ են։ Վնասվել է նաև մեկ տնատիրություն։

Հիմնական թիրախը եղել է Ուկրաինայի արևմտյան հատվածի էներգահամակարգը։ Լվովի, Տերնոպոլի և Խմելնիցկիի մարզեր ուղղվել են հրթիռների և անօդաչուների մեծ մասը։ Էներգետիկայի նախարարությունը հայտնել է, որ հարձակման հետևանքով մի շարք մարզերում ստիպված են եղել կիրառել էլեկտրաէներգիայի վթարային անջատումներ՝ համակարգի կայունությունը պահպանելու համար։