ՌԴ-ն հարվածել է «Լուկօյլ»-ի հետ համագործակցող թուրքական տանկերին

Երկուշաբթի գիշերը ռուսական անօդաչու թռչող սարքերը Դանուբի վրա գտնվող Ուկրաինայի Իզմայիլ նավահանգստում վնասել են հեղուկ բնական գազ տեղափոխող թուրքական Orinda տանկերը, ինչի հետևանքով նավի վրա հրդեհ է բռնկվել։ Ուշագրավ է, որ վնասված նավի սեփականատերը Թուրքիայի խոշորագույն ընկերություններից մեկն է, որը համագործակցում է ռուսական «Լուկօյլ»-ի հետ։

Տանկերը վնասվել է Ուկրաինայի տարածքի վրա իրականացված գիշերային զանգվածային հարձակման ժամանակ, որին, ըստ տվյալների, ներգրավված է եղել 128 անօդաչու թռչող սարք և «Իսկանդեր» տիպի երկու հրթիռ։ Օդեսայի մարզի վրա հարձակմանը մասնակցել է 28 «Գերան» տիպի ԱԹՍ։ Ինչպես հայտնել է Օդեսայի ռազմական վարչակազմի ղեկավար Օլեգ Կիպերը, հարձակման հետևանքով տուժել են նավահանգստային և էներգետիկ ենթակառուցվածքներ, ինչպես նաև մի քանի քաղաքացիական նավեր։

Թուրքական դրոշի ներքո նավարկող Orinda տանկերը տեղափոխում էր 4 հազար տոննա հեղուկացված բնական գազ։ Թուրքական իշխանությունների հաղորդմամբ՝ անձնակազմի 16 անդամներին հաջողվել է տարհանել, և նրանցից ոչ ոք չի տուժել։

Պայթյունի վտանգի պատճառով ռումինական իշխանությունները տարհանել են սահմանամերձ Պլաուրու և Չատալկիոյ գյուղերի բնակիչներին։ Այս բնակավայրերի որոշ տներ գտնվում են այրվող նավից ընդամենը 300-500 մետր հեռավորության վրա։

125 մետր երկարությամբ տանկերը 2023 թվականից պատկանում է թուրքական Orinda Denizcilik A.Ş. ընկերությանը, որը խոշոր Lokai Enerji հոլդինգի կառույցներից է։ Խմբի կայքում նշվում է, որ այն Թուրքիայում «էներգիայի մատակարարման առաջատար ընկերություն» է։

Հոլդինգի մեկ այլ կառույց՝ Dolugaz A.Ş.-ն, Թուրքիայի հեղուկացված գազի շուկայի չորս խոշորագույն ընկերություններից է՝ տարեկան մոտ 600 հազար տոննա առևտրի ծավալով։[4] 2023 թվականին Dolugaz A.Ş.-ն ընդգրկվել է Թուրքիայի 500 խոշորագույն ընկերությունների ցանկում՝ զբաղեցնելով 332-րդ հորիզոնականը։

Ուշագրավ է, որ Lokai Enerji խմբի գործընկերների ցանկում, ըստ ընկերության կայքի, նշված են ֆրանսիական TotalEnergies-ը, բրիտանական Shell-ը և ռուսական «Լուկօյլ»-ը։

Lokai Enerji-ի տնօրենների խորհրդի նախագահ Մուրատ Յըլդըրըմը Թուրքիայի արտաքին տնտեսական կապերի կոմիտեին կից գործող Թուրք-սլովակյան գործարար խորհրդի անդամ է։ Յըլդըրըմը նաև հանդիպել է Թուրքիայի կողմից վերահսկվող Հյուսիսային Կիպրոսի նախագահ Էրսին Թաթարի հետ՝ քննարկելու տարածաշրջանի էներգետիկ կարիքները։