ՌԴ-ն 118 ԱԹՍ-ով հարվածել է Ուկրաինային

Ուկրաինայի զինված ուժերի ռազմաօդային ուժերի ամփոփագրի համաձայն՝ Ռուսաստանը գիշերվա ընթացքում Ուկրաինայի ուղղությամբ արձակել է 118 անօդաչու թռչող սարք և 4 հրթիռ։ Ուկրաինական հակաօդային պաշտպանությանը հաջողվել է խոցել կամ ճնշել 101 անօդաչու։ Չորս հրթիռի և 13 անօդաչուի խոցումներ են արձանագրվել 15 տարբեր վայրերում, իսկ խոցված ԱԹՍ-ների բեկորներն ընկել են ևս երկու վայրում։

Հարձակման գլխավոր թիրախներից է եղել Դնեպր քաղաքը և Դնեպրոպետրովսկի մարզը։ Մարզային ռազմական վարչակազմի ղեկավար Վյաչեսլավ Գայվանենկոն հայտնել է, որ գիշերային հարվածի հետևանքով քաղաքում վիրավորվել է երկու մարդ։

Զգալի վնասներ են կրել քաղաքացիական ենթակառուցվածքները։ Վնասվել են վեց բնակելի շենք, վարչական շենք, խանութ և առևտրային ձեռնարկություններ։ Թիրախավորվել է նաև երկաթուղային ենթակառուցվածքը։

Հարվածից տուժել է նաև այն երկհարկանի շենքը, որտեղ տեղակայված են «Суспільне Дніпро» և «Українське радіо» լրատվամիջոցների տարածաշրջանային խմբագրությունները։ Հարձակման պահին շենքում լրագրողներ չեն եղել, սակայն այնտեղ հրդեհ է բռնկվել։

Բացի Դնեպրից, ենթակառուցվածքների վնասման մասին տեղեկություններ են ստացվել նաև Դնեպրոպետրովսկի մարզի Սամարովսկի և Պավլոգրադի շրջաններից։