ՀՀ քաղաքացիություն ստանալը՝ պարտադիր պայման

Կառավարությունը հաստատել է ԼՂ-ից բռնի տեղահանված առանձին ընտանիքների բնակարանային ապահովման պետական աջակցության ծրագրի շահառուների ցանկը։ Նախագծով առաջարկվում է «ԱՄԻՕ ԲԱՆԿ»-ի միջոցով Ծրագրի՝ ՀՀ քաղաքացիություն ձեռք բերած շահառուներին տրամադրված հիփոթեքային վարկերի ամսական մարումները (մայր գումար և տոկոսագումար) իրականացնել ՀՀ պետբյուջեի միջոցներով, քանի որ 2023թ․ սեպտեմբեր ամսից այդ վարկերի գծով ամսական մարումները չեն իրականացվում, ինչը կարող է հանգեցնել գույքերի բռնագանձման հաշվին վարկային պարտավորությունների մարման գործընթացի։

Ընդհանուր վարկային պարտավորությունը 2 մլրդ 748 մլն 446 հազար դրամ է՝ ներառյալ 10 տարիների ընթացքում վճարվող տոկոսագումարները, որից 2025թ․ մարումներ իրականացնելու նպատակով կպահանջվի շուրջ 121 մլն 444 հազար դրամ․ նշված գումարը կապահովվի ՀՀ աշխատանքի և սոցիալական հարցերի նախարարության 2025թ․ բյուջեի միջոցների հաշվին։

Որոշման ընդունման պահին ՀՀ քաղաքացիություն չունեցող շահառուների համար հիփոթեքային վարկերի մարման գործընթացը կմեկնարկի ՀՀ քաղաքացիություն ձեռք բերելուց հետո՝ հաջորդ ամսվա 20-ից։