Պուտինը բացել է Թրամփի 27 կետանոց ծրագրի փակագծերը

Ռուսաստանի Դաշնության նախագահ Վլադիմիր Պուտինը India Today հեռուստաալիքին տված ծավալուն հարցազրույցում բացահայտել է վերջերս Մոսկվայում Սթիվ Ուիթկոֆի և Ջարեդ Քուշների հետ կայացած հանդիպման ուշագրավ մանրամասները։ Ռուսաստանի ղեկավարը ներկայացրել է բանակցային սեղանին դրված փաստաթղթերի կառուցվածքը՝ նշելով, որ ամերիկյան կողմը ցուցաբերել է համակարգված և փուլային մոտեցում։

Ըստ Պուտինի հայտնած տեղեկությունների՝ ԱՄՆ-ն նախագահ Դոնալդ Թրամփի կողմից մշակված 27 կետից բաղկացած ծրագիրը բաժանել է 4 առանձին փաթեթի և առաջարկել դրանք քննարկել առանձին-առանձին։ Սա հանգեցրել է նրան, որ բանակցությունները բավականին երկարատև են ստացվել։ Ինչպես պարզաբանել է ՌԴ նախագահը, այդ տևողությունը պայմանավորված էր նրանով, որ «անհրաժեշտ էր քննարկել գրեթե յուրաքանչյուր կետ»։ Նա հատուկ ընդգծել է բանակցային հիմքը՝ նշելով, որ ամերիկյան կողմի ներկայացրած բոլոր առաջարկները, այս կամ այն կերպ, հիմնված էին նախագահ Թրամփի հետ Ալյասկայում կնքված համաձայնագրերի վրա։

Գնահատելով կայացած շփումների արդյունավետությունը՝ Պուտինը զգուշավորություն է ցուցաբերել վերջնական հետևություններ անելու հարցում։ «Հանդիպումը օգտակար էր, անհրաժեշտ, բայց վաղաժամ է որևէ բանի մասին խոսել»,- նշել է նա։ Ռուսաստանի նախագահը նկարագրել է ԱՄՆ ներկայացուցիչների գործելաոճը որպես դասական «մաքոքային դիվանագիտություն»։ Ըստ նրա՝ ամերիկացի պաշտոնյաները ներկայումս ակտիվ երթևեկում են՝ միաժամանակյա կապեր պահպանելով Ռուսաստանի, Եվրոպայի և Ուկրաինայի հետ, ինչը թույլ է տալիս համադրել տարբեր կողմերի դիրքորոշումները։

Հարցազրույցի քաղաքական հատվածում Ռուսաստանի ղեկավարը անդրադարձել է նաև հակամարտության ակունքներին և տարածքային խնդիրներին։ Նա հիշեցրել է, որ Մոսկվան նախկինում փորձել է հարաբերություններ կառուցել ԴԺՀ-ի, ԼԺՀ-ի և Ուկրաինայի միջև, սակայն Կիևը կտրականապես հրաժարվել է ճանաչել այդ միավորները։ Այս համատեքստում Պուտինը ևս մեկ անգամ շեշտել է. «Ռուսաստանը ցանկացած դեպքում կազատագրի Դոնբասը և Նովոռոսիան՝ ռազմական ճանապարհով կամ այլ կերպ»։