Պուտին-Ուիթքոֆ հանդիպումը տևել է 5 ժամ, կոմպրոմիսներ չկան

Մոսկվայում դեկտեմբերի 2-ին Ռուսաստանի նախագահ Վլադիմիր Պուտինի և Սթիվեն Ուիթքոֆի գլխավորած ամերիկյան պատվիրակության հանդիպումը տևել է գրեթե հինգ ժամ։ Բանակցությունները, որոնց մասնակցել է նաև Ջարեդ Քուշները, ռուսական կողմից գնահատվել են արդյունավետ։ Մասնավորապես, Կիրիլ Դմիտրիևը նշել է բանակցային գործընթացի պրոդուկտիվ բնույթը։

Հանդիպման ավարտից հետո Ռուսաստանի նախագահի օգնական Յուրի Ուշակովը մամուլին ներկայացրել է քննարկումների հիմնական արդյունքներն ու մանրամասները։ Ըստ Ուշակովի՝ կողմերը քննարկել են ոչ թե կոնկրետ ձևակերպումներ կամ տեխնիկական լուծումներ, այլ խնդիրների բուն էությունը։ Կրեմլում կայացած հանդիպման ընթացքում օրակարգում են եղել Ուկրաինայի հակամարտության կարգավորման պլանի մի քանի տարբերակներ։ Հատկանշական է, որ բացի Թրամփի կողմից ի սկզբանե ներկայացված կարգավորման 28 կետանոց ծրագրից, Մոսկվան ամերիկյան կողմից ստացել է ևս չորս լրացուցիչ փաստաթուղթ։

Բանակցությունների ընթացքում անդրադարձ է կատարվել նաև տարածքային հարցերին։ Թեև կողմերը որոշ հարցերի շուրջ համաձայնության են եկել, եղել են նաև կետեր, որոնք քննադատության են արժանացել։ Ուշակովը հայտնել է, որ այս պահի դրությամբ վերջնական կոմպրոմիսներ դեռևս գտնված չեն, և երկու երկրների առաջնորդների հանդիպում ներկայումս նախատեսված չէ։

Այնուամենայնիվ, երկարաժամկետ խաղաղության հասնելու ուղղությամբ աշխատանքները շարունակվելու են, քանի որ կողմերը փոխգործակցության համար «հսկայական հեռանկարներ» են տեսնում։ Ձեռք է բերվել պայմանավորվածություն՝ չհրապարակել բանակցությունների բուն էությունը։

Հանդիպման ավարտին Վլադիմիր Պուտինը Սթիվեն Ուիթքոֆի միջոցով Թրամփին է փոխանցել բարեկամական ողջույններ և մի շարք քաղաքական ազդակներ։ Կրեմլից հեռանալուց հետո Ուիթքոֆն ուղևորվել է Մոսկվայում ԱՄՆ դեսպանատուն։

Նախատեսվում է, որ ամերիկյան պատվիրակության ներկայացուցիչները կվերադառնան Վաշինգտոն՝ քննարկելու Կրեմլում արծարծված հարցերը, որից հետո հեռախոսակապի միջոցով կրկին կկապնվեն Մոսկվայի հետ՝ շարունակելու երկխոսությունը։