«Կոմերսանտ». Պուտին-Թրամփ հանդիպումը չեղարկվել է ոչ Կրեմլի մեղքով

Բուդապեշտում նախատեսված՝ ԱՄՆ նախագահ Դոնալդ Թրամփի և Վլադիմիր Պուտինի հանդիպման չեղարկման շուրջ քաղաքական դաշտում շարունակվում են քննարկումները։ Մինչ արևմտյան մամուլը որպես պատճառ նշում է ուկրաինական հարցում Կրեմլի դիրքորոշման կտրուկ խստացումը, ռուսական «Կոմերսանտ» պարբերականը, հղում անելով ՌԴ արտաքին գործերի նախարարության անանուն աղբյուրին, հերքում է այս վարկածը՝ առաջ քաշելով իր փաստարկները։

Ավելի վաղ բրիտանական հեղինակավոր Financial Times պարբերականը գրել էր, թե բանակցությունների տապալման պատճառը եղել է ռուսական կողմի ներկայացրած «ուկրաինական հուշագիրը»։ Ըստ FT-ի՝ փաստաթուղթը պարունակել է «մաքսիմալիստական պահանջներ», որոնք ստանալուց հետո նախագահ Թրամփը Պուտինի հետ հանդիպումն անիմաստ է համարել։ Այս տեղեկությունը, ըստ պարբերականի, ամրապնդվել է ԱՄՆ պետքարտուղար Մարկո Ռուբիոյի հայտարարությամբ, ով Ռուսաստանի և ԱՄՆ-ի արտաքին քաղաքական գերատեսչությունների ղեկավարների հեռախոսազրույցից հետո նշել էր, որ Մոսկվան պատրաստ չէ բանակցությունների։

Սակայն «Կոմերսանտ»-ի զրուցակիցը ներկայացնում է իրադարձությունների բոլորովին այլ ժամանակագրություն և մեկնաբանություն։ Ըստ ռուս դիվանագետի՝ նախագահների հեռախոսազրույցից հետո որևէ «հուշագիր» չի եղել։ Փոխարենը, եղել է դիրքորոշումներն ամրագրող ոչ պաշտոնական փաստաթուղթ, որը Մոսկվան Վաշինգտոն էր ուղարկել դեռևս մինչև հոկտեմբերի 16-ին կայացած Թրամփ-Պուտին հեռախոսազրույցը։ Հենց այդ զրույցից հետո էր, որ Թրամփը հայտարարել էր Բուդապեշտում հանդիպելու մտադրության մասին։

Աղբյուրը պնդում է, որ այդ փաստաթղթում նոր կամ խստացված դիրքորոշում չի եղել։ Այնտեղ ընդամենը ամրագրված էր այն նույն դիրքորոշումը, որը Վլադիմիր Պուտինը հրապարակավ հնչեցրել էր դեռևս Անքորիջում։ «Հետևաբար, ռուսական փաստաթուղթը ոչ մի կերպ չէր կարող Բուդապեշտում հանդիպման տապալման պատճառ դառնալ», – եզրափակում է պարբերականը՝ ամփոփելով իր դիվանագիտական աղբյուրի պարզաբանումները։

Այսպիսով, Մոսկվան պաշտոնապես հերքում է բանակցային գործընթացը սեփական անզիջումականության պատճառով տապալելու մեղադրանքները։ Այնուամենայնիվ, թե որն է եղել բուդապեշտյան գագաթնաժողովի չեղարկման իրական պատճառը, «Կոմերսանտ»-ը չի հստակեցնում։