Մոսկվայում կայացել է Պուտինի և Ալ-Շարաայի հանդիպումը

Սիրիայի անցումային շրջանի նախագահ Ահմեդ աշ-Շարաան Կրեմլում հանդիպել է Ռուսաստանի նախագահ Վլադիմիր Պուտինի հետ՝ նշանավորելով երկու երկրների հարաբերություններում նոր փուլի մեկնարկը՝ Բաշար ալ-Ասադի ռեժիմի անկումից հետո։ Բանակցությունների հիմնական լեյտմոտիվը դարձել է Դամասկոսի հստակ մտադրությունը՝ վերագործարկել հարաբերությունները Մոսկվայի հետ և հիմք դնել ապագա համագործակցության համար։

Իր խոսքում աշ-Շարաան ընդգծել է, որ Սիրիայի նոր իշխանությունները մտադիր են վերականգնել և վերաիմաստավորել կապերը Ռուսաստանի հետ։ «Սիրիան կփորձի վերստեղծել իր հարաբերությունները Ռուսաստանի հետ... Այժմ ամենակարևորը, իհարկե, կայունությունն է։ Կայունություն՝ թե՛ երկրում, թե՛ ամբողջ տարածաշրրջանում»,— ասել է նա։ Սիրիայի ղեկավարը նշել է, որ Ռուսաստանին և Սիրիային կապում են «պատմական կապեր», և որ Մոսկվան «լուրջ դերակատարում» է ունենալու նոր Սիրիայի զարգացման գործում։ Նա նաև հավելել է, որ «Սիրիան հենվում է բազմաթիվ ձեռքբերումների վրա, որոնց Ռուսաստանը թույլ է տվել հասնել տարբեր ոլորտներում»։

Իր հերթին, նախագահ Պուտինը նշել է, որ Սիրիան «դժվարին ժամանակներ» է ապրում, սակայն հույս է հայտնել, որ վերջերս կայացած խորհրդարանական ընտրությունները կամրապնդեն համագործակցությունը երկրի բոլոր քաղաքական ուժերի միջև։ Ռուսաստանի ղեկավարը հատուկ ընդգծել է պատմական համատեքստը՝ պնդելով, որ իր պատմության ընթացքում Ռուսաստանը Սիրիայի հետ հարաբերություններում «միշտ առաջնորդվել է Սիրիայի ժողովրդի շահերով, այլ ոչ թե քաղաքական նպատակահարմարությամբ»։

Անդրադառնալով ապագային, աշ-Շարաան վստահեցրել է, որ Սիրիան հարգում է Մոսկվայի և Դամասկոսի միջև նախկինում կնքված բոլոր համաձայնագրերը և ձգտում է «սահմանել երկկողմ հարաբերությունների նոր բնույթ»։ Փաստացի, հանդիպումը դարձավ երկու կողմերի պատրաստակամության հրապարակային դրսևորում՝ հակառակ Սիրիայում իշխանության փոփոխությանը՝ պահպանելու գործընկերությունը, միևնույն ժամանակ այն հարմարեցնելով տարածաշրջանում ձևավորված նոր իրողություններին։