Պուտինը ՇՀԿ-ում կհանդիպի Էրդողանի և Փեզեշքիանի հետ

Ռուսաստանի նախագահ Վլադիմիր Պուտինը Չինաստանում Շանհայի համագործակցության կազմակերպության (ՇՀԿ) գագաթնաժողովի շրջանակներում հանդիպում կունենա Թուրքիայի նախագահ Ռեջեփ Թայիփ Էրդողանի հետ։ Այդ մասին հայտնել է Ռուսաստանի նախագահի օգնական Յուրի Ուշակովը։ Կկայանա նաև հանդիպում Իրանի նախագահ Մասուդ Փեզեշքիանի հետ։

«Նախատեսվում է զրույց Թուրքիայի նախագահ Ռեջեփ Թայիփ Էրդողանի հետ։ Առաջնորդները մշտական կապի մեջ են, շատ են խոսում հեռախոսով... Սա այս տարվա առաջին հանդիպումը կլինի Չինաստանում։ Իր թուրք գործընկերոջից հետո հերթը Իրանի նախագահ Մասուդ Փեզեշքիանինն է», - ասել է Ուշակովը։

Պուտինը Չինաստան կայցելի օգոստոսի 31-ից սեպտեմբերի 3-ը։ Այցի շրջանակներում նախագահը կմասնակցի ՇՀԿ գագաթնաժողովին, որը տեղի կունենա Չինաստանի Տյանցզին քաղաքում օգոստոսի 31-ից սեպտեմբերի 1-ը։

Նշված երկուսից բացի, ՌԴ նախագահը այլ հանդիպումներ ևս կունենա։ Ըստ ռուսական աղբյուրների՝ Պուտինն այս ընթացքում մոտ մեկ տասնյակ հանդիպումներ է պլանավորում։

Ի դեպ, հայկական որոշ լրատվամիջոցներ գրում են նաև Փաշինյան-Պուտին հանդիպման հավանականության մասին։ Այս տեղեկությունը պաշտոնապես ոչ հաստատվել և ոչ էլ հերքվել է։