Արքայազն Էնդրյուն և Սառա Ֆերգյուսոնը զրկվեցին տիտղոսներից

Արքայազն Էնդրյուն և նրա նախկին կինը՝ Սառա Ֆերգյուսոնը, պաշտոնապես զրկվել են իրենց թագավորական տիտղոսներից և այլևս չեն հանդիսանում Յորքի դուքս և դքսուհի։ Այս որոշումը կայացվել է արքայազնի շուրջ չդադարող սկանդալների ֆոնին, որոնք կապված են ամերիկացի ֆինանսիստ և սեռական հանցագործ Ջեֆրի Էպշտեյնի հետ նրա կապերի հետ։

Հոկտեմբերի 17-ին Բուքինգհեմյան պալատի տարածած հայտարարության մեջ Յորքի նախկին դուքսը նշել է, որ իր դեմ «շարունակվող մեղադրանքները» և Էպշտեյնի հետ կապը «շեղում են ուշադրությունը Նորին Մեծության և թագավորական ընտանիքի աշխատանքից»։

«Ես որոշել եմ, ինչպես միշտ, իմ ընտանիքի և երկրի հանդեպ իմ պարտականությունը դնել առաջին տեղում», - ասվում է հայտարարության մեջ։ «Նորին Մեծության համաձայնությամբ ես այլևս չեմ օգտագործի իմ տիտղոսը և ինձ շնորհված պատվավոր տիտղոսները»։ 64-ամյա արքայազնը, սակայն, շարունակում է «կտրականապես հերքել բոլոր մեղադրանքները»։

Սա առաջին դեպքը չէ, որ Էնդրյուն զրկվում է իր արտոնություններից։ 2022 թվականի հունվարին նա արդեն կորցրել էր իր զինվորական տիտղոսները, թագավորական հովանավորությունը և «Նորին Թագավորական Մեծություն» տիտղոսը պաշտոնապես օգտագործելու իրավունքը։ Չնայած այս ամենին, Էնդրյուն մնում է արքայազն՝ որպես հանգուցյալ Եղիսաբեթ II թագուհու որդի, և կշարունակի բնակվել Royal Lodge-ի իր նստավայրում։

Տիտղոսներից զրկվելու որոշումը համընկնում է Վիրջինիա Ջուֆրեի հետմահու հուշագրության՝ «Nobody’s Girl: A Memoir of Surviving Abuse and Fighting for Justice», հրապարակման նախաշեմին։ Ջուֆրեն, որը Էնդրյուին մեղադրում էր սեռական ոտնձգության մեջ, մահացել է այս տարվա ապրիլին։

Միևնույն ժամանակ, Սառա Ֆերգյուսոնը, որը նույնպես այլևս չի կրի Յորքի դքսուհու տիտղոսը, վերջերս հեռացվել էր իր բարեգործական գործունեությունից։ Պատճառը Daily Mail-ի կողմից Էպշտեյնին ուղղված նրա 2011 թվականի նամակի հրապարակումն էր, որտեղ Ֆերգյուսոնը նրան անվանել էր «առատաձեռն և նվիրված ընկեր»։ Դրանից հետո Ջուլիայի տունը՝ մանկական հոսպիսը, որի պատվավոր հովանավորն էր նա, դադարեցրել է համագործակցությունը՝ հայտարարելով. «կազմակերպությունն անհնար է համարում նրա համար շարունակել որպես հովանավոր»։

Էնդրյուի և Սառայի դուստրերը՝ արքայադուստրեր Եվգենիան և Բեատրիսը, կպահպանեն իրենց տիտղոսները և թագավորական ընտանիքի անդամների կարգավիճակը։