Պոկրովսկը կարող է դառնալ Բախմուտից հետո Ռուսաստանի երկրորդ մեծ հաջողությունը

Դոնեցկի մարզի առանցքային քաղաք Պոկրովսկի համար մղվող կատաղի մարտերը շարունակվում են՝ ուղեկցվելով հակասական տեղեկություններով և ռազմավարական կարևորության գնահատականներով։ Մինչ ուկրաինական կողմը հայտնում է տեղային հաջողությունների մասին, արևմտյան փորձագետներն ու լրատվամիջոցները ներկայացնում են իրավիճակի ավելի զգուշավոր և բազմաշերտ պատկեր։

Իրավիճակի շուրջ բանավեճի առիթ դարձավ ուկրաինական «Սկալա» 425-րդ գնդի հրապարակած տեսանյութը, որտեղ երևում է, թե ինչպես են զինվորականները քաղաքի կենտրոնում տեղադրում Ուկրաինայի դրոշը՝ հայտարարելով տարածքի «մաքրման» մասին։ Սակայն այս տեղեկությունը կասկածի տակ է դրել գերմանական Bild-ի ռազմական վերլուծաբան Յուլիան Ռյոպկեն։ Նա պնդում է, որ ռուսական ուժերը երբեք չեն վերահսկել Պոկրովսկի կենտրոնը, ուստի այն «մաքրելու» մասին հայտարարությունները կարող են իրականությանը չհամապատասխանել։

«Պոկրովսկի կենտրոնը եղել է և, ամենայն հավանականությամբ, մնում է Ուկրաինայի վերահսկողության տակ։ Ռուսները երբեք չեն մտել այդ շրջան, որպեսզի դրոշով ակցիա իրականացվի։ Ուկրաինացիները երբեք չեն հրապարակել տեսանյութեր, թե ինչպես են հարվածում ռուսներին այդ տարածքում», - մեկնաբանել է Ռյոպկեն։

Միևնույն ժամանակ, Պատերազմի ուսումնասիրության ինստիտուտի (ISW) վերլուծաբանները հաստատում են, որ Պոկրովսկում մարտերը շարունակվում են։ Հղում անելով աշխարհագրական տեղորոշմամբ տեսանյութերին՝ նրանք նշում են, որ Ուկրաինայի Զինված ուժերն առաջխաղացում են ունեցել Շախովոյից հյուսիս-արևելք և հարավ-արևելք, սակայն ռուսական զորքերը նույնպես տեղային հաջողությունների են հասել՝ առաջ շարժվելով Պոկրովսկից հյուսիս գտնվող Ռոդինսկոեի արևմտյան մասում, ինչպես նաև քաղաքի հյուսիս-արևելյան հատվածում։

Այս ֆոնին The Wall Street Journal-ը ընդգծում է Պոկրովսկի բացառիկ ռազմավարական նշանակությունը։ Ըստ պարբերականի, եթե քաղաքն ընկնի, դա Ռուսաստանի համար Բախմուտից հետո ամենախոշոր ձեռքբերումը կլինի։ Պոկրովսկի նկատմամբ վերահսկողությունը ճանապարհ կբացի դեպի ավելի թույլ պաշտպանված Դնեպրոպետրովսկի և Զապորոժիեի մարզեր։ WSJ-ը նաև կարծիք է հայտնում, որ Ռուսաստանը կփորձի օգտագործել այս հնարավոր հաջողությունը՝ նախագահ Թրամփին համոզելու համար, որ Ուկրաինան ի վիճակի չէ կանգնեցնել Մոսկվային իր առավելագույն նպատակներին հասնելու ճանապարհին։