Պեկինը Վաշինգտոնին մեղադրում է գողության մեջ

Չինաստանի և ԱՄՆ-ի միջև տեխնոլոգիական և առևտրային լարվածությունը նոր թափ է հավաքում։ Պաշտոնական Պեկինը հանդես է եկել սուր մեղադրանքներով՝ հայտարարելով, որ ԱՄՆ-ի Ազգային անվտանգության գործակալությունը (ԱԱԳ) կիբերհարձակումներ է իրականացրել և պետական գաղտնիքներ գողացել Չինաստանի Ժամանակի ազգային կենտրոնից։ Սա ռազմավարական նշանակություն ունեցող հաստատություն է, որը պատասխանատու է երկրի բարձր ճշգրտության ժամանակի չափորոշիչների համար։

Չինաստանի ազգային անվտանգության մարմինները պնդում են, որ իրենց հետաքննության արդյունքում ձեռք են բերվել «անհերքելի ապացույցներ»։ Ըստ դրանց, ԱԱԳ-ի աշխատակիցները, օգտվելով կենտրոնի որոշ աշխատակիցների բջջային հեռախոսների խոցելիություններից, կարողացել են գողանալ նրանց հաշիվների տվյալները։ Այդ հավատարմագրերն այնուհետև օգտագործվել են կենտրոնի համակարգիչներ ներթափանցելու և գաղտնի տեղեկություններ ձեռք բերելու համար։

Հետաքննությունը ցույց է տվել, որ կիբերհարձակումները կրել են համակարգված և երկարատև բնույթ՝ սկսվելով դեռևս 2022 թվականից։ Դրանց հիմնական թիրախներն են եղել կենտրոնի ներքին ցանցային համակարգերը և վերգետնյա ժամանակի համաժամացման բարձր ճշգրտության համակարգը։ Հարձակումների իրական աղբյուրը թաքցնելու նպատակով հաքերներն օգտագործել են ամբողջ աշխարհում տեղակայված մասնավոր սերվերներ՝ փորձելով խառնել հետքերը։

Չինաստանի Ժամանակի ազգային կենտրոնը, որը գտնվում է երկրի հյուսիս-արևմուտքում՝ Սիան քաղաքում, կարևորագույն ազգային հաստատություն է։ Այն ոչ միայն բարձր ճշգրտության ծառայություններ է մատուցում կառավարությանն ու տարբեր ոլորտներին, այլև տրամադրում է կարևոր տվյալներ միջազգային ստանդարտ ժամանակի հաշվարկման համար, ինչը նրա գործունեությունը դարձնում է կենսական նշանակության։

Այս մեղադրանքները հնչում են Արևմուտքի կառավարությունների և ընկերությունների կողմից չինացի հաքերներին ուղղված բազմաթիվ մեղադրանքներին ի պատասխան։ Ինչպես ընդգծում է Bloomberg-ը, այս դիմակայությունը ծավալվում է ԱՄՆ-ի և Չինաստանի միջև առևտրային հարաբերությունների շարունակվող սրման ֆոնին, ինչը ևս մեկ անգամ վկայում է, որ երկու գերտերությունների մրցակցությունը գնալով ավելի է խորանում կիբերտարածությունում։