Հնդկաստանի Ջամու և Քաշմիր նահանգում պայթյունը խլել է 9 մարդու կյանք

Հնդկաստանի հյուսիսային Ջամու և Քաշմիր նահանգի ոստիկանական բաժանմունքներից մեկում տեղի ունեցած հզոր պայթյունի հետևանքով զոհվել է առնվազն ինը մարդ, ևս երեսուներկուսը ստացել են տարբեր աստիճանի մարմնական վնասվածքներ։ Այս մասին հաղորդում է հնդկական NDTV հեռուստաալիքը՝ մանրամասնելով, որ զոհերի գերակշիռ մասը ոստիկանության աշխատակիցներ և քրեագետներ են։ Զոհերի թվում են նաև երկու բարձրաստիճան պաշտոնյաներ։

Ողբերգական միջադեպը տեղի է ունեցել այն ժամանակ, երբ իրավապահները ստուգում էին ավելի վաղ առգրավված պայթուցիկ նյութերի խոշոր խմբաքանակը։ Հատկանշական է, որ վերջերս հենց այս ոստիկանական բաժանմունքն էր բացահայտել ահաբեկչական ցանց, որը զբաղվում էր «Ջաիշ-ի-Մոհամմեդ» իսլամիստական խմբավորման քարոզչական պաստառների տարածմամբ։ Այդ գործի շրջանակներում ոստիկանությունը ձերբակալել էր խմբավորման հետ առնչություն ունեցող մի քանի կասկածյալների և առգրավել պայթուցիկները, որոնց զննությունն էլ դարձել է ճակատագրական։

Ջամու և Քաշմիրը վիճելի տարածաշրջան է Հինդուստան թերակղզու հյուսիս-արևմուտքում, որի 45%-ը վերահսկում է Հնդկաստանը, 35%-ը՝ Պակիստանը, իսկ 20%-ը՝ Չինաստանը։ Քաշմիրի պատկանելության շուրջ տասնամյակներ տևող վեճերը երկու անգամ՝ 1965 և 1999 թվականներին, հանգեցրել են լայնամասշտաբ պատերազմների Հնդկաստանի և Պակիստանի միջև։ Իրավիճակը տարածաշրջանում կրկին սրվել է 2019 թվականից հետո, երբ Նյու Դելին վերացրեց նահանգի ինքնավար կարգավիճակը, ինչը տեղի բնակչության շրջանում զանգվածային բողոքի ցույցերի առիթ դարձավ։