Փաշինյանը և Ալիևը արձագանքել են Թրամփի գրառմանը

Թրամփը հրապարակել էր Վաշինգտոնում օգոստոսի 8-ին արված լուսանկարն ու գրել, որ մեծ պատիվ է օգնել կարգավորել պատերազմն Ադրբեջանի և Հայաստանի հետ ու միևնույն ժամանակ ընկերանալ այս երկու մեծ առաջնորդների և մարդկանց հետ։ «Սա հավերժական բարեկամություն կլինի ինձ համար, բայց ավելի կարևորը՝ Ամերիկայի Միացյալ Նահանգների համար»,- գրել էր Թրամփը։

Վաշինգտոնից հնչած զգացմունքային հիշեցումներին օպերատիվ արձագանքել են Երևանից ու Բաքվից։

ՀՀ վարչապետն առաջինն է արձագանքել։

Փաշինյանը գրել է, թե վերահաստատում է իր հանձնառությունը խաղաղության ինստիտուցիոնալացման և TRIPP-ի իրականացման հետագա աշխատանքներին։ Շնորհակալ է Ադրբեջանի հետ «այդ պատմական համաձայնագրի կնքման միջնորդության համար, ինչին դեռ ոչ ոք չէր հասել»։

Ադրբեջանի նախագահը մի փոքր ավելի ուշ արձագանքեց։ Իլհամ Ալիևը, Թրամփի գրառմանն ի պատասխան, հրապարակել է մեկ այլ լուսանկար ու գրել, որ բարձր է գնահատում Թրամփի դերն Ադրբեջանի և Հայաստանի միջև խաղաղության գործընթացի առաջխաղացման համար։ Այս դեպքում հետաքրքիրն ընտրված լուսանկարն է։

Ալիևը հրապարակել է իր ու Փաշինյանի համատեղ լուսանկարը։ Ընդ որում, Փաշինյանը ոչ կռացած է, ոչ ծամածռված կամ ինչ-որ անհարմար վիճակում, ինչպես լինում է ադրբեջանական սեգմենտում հրապարակվող լուսանկարների մեծ մասում։ Այս անգամ հրապարակվածը Սպիտակ տանը Փաշինյանի ու Ալիևի համատեղ լուսանկարն էր՝ Դոնալդ Թրամփին պատկերող կտավի դիմաց։