Փաշինյանը գրառում է արել WizzAir-ի և ԵՄ վիզաների ազատականացման մասին

WizzAir-ը բազավորվում է Հայաստանում։ Սա կարեւոր լուր է Հայաստանի համար եւ Կառավարության վարած սոցիալական քաղաքականության կարեւոր ձեռքբերում։ Այդ մասին գրել է Նիկոլ Փաշինյանը։

«Սխալների, ձախողումների միջով մենք հասնում ենք մեր նպատակին․ մենք ուզում ենք, որ մեր քաղաքացիներն աշխարհով ճամփորդելու հնարավորություն ունենան, եւ WizzAir-ի նման ավիաընկերությունները բացում են այդ հնարավորությունները սոցիալական ամենալայն շերտերի համար»,- մասնավորապես գրել է ՀՀ վարչապետը։ Որպես հետգրություն էլ հիշեցրել է, որ լուծման ճանապարհին է նաև դեպի Եվրոպա վիզաների ազատականացման հարցը։ «Այս համատեքստում, իհարկե, շատ կարեւոր է ԵՄ-ի հետ վիզաների ազատականացման գործընթացը, որի շուրջ բանակցությունները գտնվում են ինտենսիվ փուլում»,- գրել է Փաշինյանը։