Փաշինյան․ Հայաստանում «Զանգեզուրի միջանցք» չի լինելու

Հայաստանի տարածքում չի կարող լինել «Զանգեզուրի միջանցք» անունով ենթակառուցվածք։ Այդ մասին Ազգային ժողովում հայտարարեց վարչապետ Նիկոլ Փաշինյանը՝ իր խոսքում չօգտագործելով ադրբեջանական եզրույթը և հղում անելով ՔՊ-ական պատգամավոր Արուսյակ Ջուլհակյանի հարցին։

Պատգամավորը վարչապետին հարցրել էր, թե արդյոք կառավարությունն անհանգստացած չէ Իլհամ Ալիևի հայտարարություններով, որտեղ նորից հիշատակվում է այսպես կոչված «Զանգեզուրի միջանցք» արտահայտությունը։

Փաշինյանն ասաց, որ էական չէ, թե ինչ են խոսում Ադրբեջանում, քանի որ կա փաստաթուղթ, որտեղ ամեն ինչ գրված է սևով սպիտակի վրա։

Նա նշեց, որ պատգամավորի հիշատակած տերմինաբանությունը՝ «Զանգեզուրի միջանցքը», կապ չունի Հայաստանի ստանձնած պարտավորությունների հետ և, առավել ևս, այժմ կապ չունի՝ հենց Վաշինգտոն օգոստոսի 8-ի ստորագրված փաստաթղթի ուժով։