Գեներալները Փաշինյանի օրոք. ոմանք ծառայում են, ոմանք՝ ազատված կամ ազատազրկված

Ոստիկանության զորքերի հրամանատարն ազատվել է զբաղեցրած պաշտոնից վարչապետի առաջարկով՝ առանց հրապարակված պատճառաբանության։ Սա հերթական դեպքն է, երբ ուժային կառույցների բարձրաստիճան պաշտոնյաները, գեներալի կոչում ստանալուց հետո, կարճ ժամանակ անց հեռացվում են պաշտոնից կամ հայտնվում հակասությունների կենտրոնում։ Վերջին տարիներին գեներալական կոչում ստացած բազմաթիվ զինվորականներ անցել են պաշտոնանկությունների, քրեական գործերի կամ քաղաքական բախումների միջով։ Միևնույն ժամանակ, կան նաև սպաներ, որոնք շարունակել են ծառայությունը՝ պահպանելով իրենց պաշտոններն ու հեղինակությունը։