Փաշինյանը շնորհավորել է Ուրուգվայի նախագահին Անկախության օրվա առթիվ

Վարչապետ Նիկոլ Փաշինյանը շնորհավորական ուղերձ է հղել Ուրուգվայի Արևելյան Հանրապետության նախագահ Յամանդու Օրսիին ազգային տոնի՝ Անկախության օրվա առիթով: Այս մասին հայտնում է ՀՀ վարչապետի աշխատակազմի տեղեկատվության և հասարակայնության հետ կապերի վարչությունը։

«Բարձր ենք գնահատում մեր երկու պետությունների միջև առկա բարեկամական հարաբերությունները, որոնք հիմնված են փոխադարձ հարգանքի, վստահության և ընդհանուր արժեքների վրա:

Այդ հարաբերությունների բնույթի և բովանդակության մասին են փաստում քաղաքական սերտ երկխոսությունն ու բարձրաստիճան փոխայցելությունները, որոնք հնարավորություն են տալիս նախանշել երկուստեք հետաքրքրություն ներկայացնող բոլոր ոլորտներում մեր երկրների միջև համագործակցության հետագա զարգացման ուղիները»,- գրել է Նիկոլ Փաշինյանը՝ վերահաստատելով Հայաստան պաշտոնական այց կատարելու իր հրավերը Ուրուգվայի նախագահին։