ՀՀ-ն պատրաստ է տարանցիկ ուղի տրամադրել Թուրքիային և Ադրբեջանին. Փաշինյան

Հայաստանը պատրաստ է անհապաղ ապահովել բեռնատար ավտոմեքենաների տարանցումը Թուրքիայից դեպի Ադրբեջան և հակառակ ուղղությամբ։ Այս մասին հոկտեմբերի 22-ին Թբիլիսիում ընթացող «Մետաքսի ճանապարհ» միջազգային համաժողովի ժամանակ հայտարարել է ՀՀ վարչապետ Նիկոլ Փաշինյանը՝ ներկայացնելով կոնկրետ երթուղի և ենթակառուցվածքների պատրաստվածության մակարդակը։

Այս հայտարարությունը հաջորդել է Ադրբեջանի նախագահ Իլհամ Ալիևի՝ նախօրեին արված հայտարարությանը, որով Բաքուն վերացնում էր իր տարածքով դեպի Հայաստան բեռների տարանցման սահմանափակումները։ Փաշինյանն իր ելույթում ողջունել էր Ալիևի այդ քայլը՝ այն որակելով «չափազանց կարևոր»։

Ի պատասխան և որպես կառուցողական քայլ՝ Հայաստանի ղեկավարը հստակեցրել է, թե ինչ է առաջարկում հայկական կողմը։ «Մենք պատրաստ ենք հենց այսօրվանից ՀՀ-ի տարածքով ապահովել բեռնատար ավտոմեքենաների տարանցումը Թուրքիայից դեպի Ադրբեջան և Ադրբեջանից դեպի Թուրքիա», - ընդգծել է նա։

Վարչապետը նաև մանրամասնել է, որ համապատասխան ենթակառուցվածքներն արդեն իսկ առկա են։ «Հայաստանի տարածքում թե՛ ճանապարհները, թե՛ սահմանային ենթակառուցվածքները պատրաստ են սրա համար՝ Մարգարա-Եղեգնաձոր-Սիսիան-Գորիս երթուղով», - նշել է Փաշինյանը։

Միևնույն ժամանակ, վարչապետը հստակ տարանջատում է դրել այս առաջարկի և Ադրբեջանի հիմնական տարածքի ու Նախիջևանի միջև հաղորդակցության հարցի միջև։ Նրա խոսքով, այս ուղղությամբ Հայաստանը դեռևս միայն քաղաքական պատրաստակամություն ունի։

«Քաղաքական առումով մենք պատրաստ ենք ապահովել Նախիջևանի Ինքնավար Հանրապետությունից դեպի Ադրբեջանի հիմնական մաս և հակառակ ուղղությամբ տարանցումը Հայաստանի տարածքով, բայց տեխնիկապես դեռևս պատրաստ չենք՝ ենթակառուցվածքների բացակայության պատճառով», - պարզաբանել է նա։

Նույն տրամաբանությամբ ներկայացվել է նաև երկաթուղային հաղորդակցության հարցը։ Փաշինյանը վերահաստատել է Թուրքիայի և Ադրբեջանի, ինչպես նաև Թուրքիայի և Նախիջևանի միջև երկաթուղային տարանցում ապահովելու քաղաքական պատրաստակամությունը, սակայն նշել է, որ այդ հատվածներում գծերը վերանորոգման կամ վերակառուցման կարիք ունեն։

Եզրափակելով խոսքը՝ ՀՀ վարչապետը լավատեսական կանխատեսում է արել այս տեխնիկական խնդիրների լուծման վերաբերյալ։ «Համոզված եմ և վստահ եղեք, այս տեխնիկական հարցերը ևս երկու-երեք տարվա ընթացքում կլուծվեն», - ավելացրել է Փաշինյանը։