Պայթյուն և փոխհրաձգություն Պակիստանում. կա ութ զոհ

Պակիստանի Բելուջիստան նահանգի վարչական կենտրոն Քվետտա քաղաքում որոտացել է հզոր պայթյուն, որին անմիջապես հաջորդել է ինտենսիվ փոխհրաձգություն։ Միջադեպի հետևանքով զոհվել է առնվազն ութ մարդ, այդ թվում՝ անվտանգության ուժերի երեք աշխատակից։

Միջադեպը տեղի է ունեցել քաղաքի կենտրոնական փողոցներից մեկում՝ Զարգուն-ռոուդում, որտեղ տեղակայված են մի շարք կարևոր օբյեկտներ։ Ըստ ոստիկանության նախնական տվյալների, պայթյունն այնքան հզոր է եղել, որ հարվածային ալիքից դուրս են թռել հարակից շենքերի պատուհաններն ու դռները՝ պատճառելով զգալի նյութական վնաս։

Ականատեսների վկայությամբ, պայթյունից անմիջապես հետո տարածքում սկսվել է կատաղի փոխհրաձգություն, ինչը վկայում է հարձակման համակարգված բնույթի մասին։ Դեպքի վայր են ժամանել անվտանգության ուժերի մեծաթիվ ստորաբաժանումներ, ոստիկանության և փրկարարական ծառայության աշխատակիցներ։ Իրավապահները շրջափակել են ամբողջ տարածքը՝ քննչական գործողություններ իրականացնելու և հնարավոր նոր հարձակումները կանխելու նպատակով։

Հարձակման հետևանքով զոհերի թվում են Սահմանային կորպուսի ուժերի երեք աշխատակիցներ։ Հատկանշական է, որ պայթյունը տեղի է ունեցել տեղական անվտանգության ուժերի կողմից հսկվող օբյեկտի անմիջական հարևանությամբ, ինչը ամրապնդում է այն վարկածը, որ հարձակման թիրախը եղել են հենց ուժային կառույցները։

Իրավիճակի լրջությամբ պայմանավորված՝ նահանգի առողջապահության նախարարի հանձնարարությամբ Քվետտա քաղաքի բոլոր հիվանդանոցներում հայտարարվել է արտակարգ դրություն՝ վիրավորներին անհրաժեշտ բժշկական օգնություն ցուցաբերելու համար։ Այս պահին իրավապահ մարմինները պարզում են միջադեպի պատճառներն ու հանգամանքները։ Ոչ մի խմբավորում դեռևս չի ստանձնել տեղի ունեցածի պատասխանատվությունը։