Պակիստանում ահաբեկչության հետևանքով զոհվել է 13 մարդ

Առնվազն 13 մարդ զոհվել է, 31-ը՝ վիրավորվել՝ Պակիստանի հարավ-արևմտյան Բելուջիստան նահանգի վարչական կենտրոն Քվետա մեգապոլիսում մահապարտ ահաբեկչի կողմից իրականացված պայթյունի հետևանքով։ Ինչպես հայտնում է Xinhua գործակալությունը, ահաբեկչությունը տեղի է ունեցել տեղի մարզադաշտի մոտ գտնվող ավտոկայանատեղիում՝ Բելուջիստանի ազգային կուսակցության կողմից անցկացված բազմամարդ հանրահավաքի ավարտից հետո։ Ոստիկանության տվյալներով՝ ահաբեկչական հարձակումը ուղղված էր կուսակցության առաջնորդների դեմ։ Հիվանդանոց տեղափոխված վիրավորներից շատերը ծանր վիճակում են, բժիշկները չեն բացառում, որ զոհերի թիվը կարող է աճել։

Հիշեցնենք՝ Բելուջիստանում, որը սահմանակից է Իրանին և Աֆղանստանին, իրավիճակը լարված է մնում 2021 թվականի վերջից՝ ազգայնական և անջատողական խմբավորումների ակտիվացման պատճառով, որոնք դեմ են Պակիստանի կառավարության կողմից երկրի կենտրոնացմանն ուղղված միջոցառումներին։ Նրանց գործողությունները սպառնում են Բելուջիստանում գտնվող Գվադար ծովային նավահանգստի անվտանգությանը, որը համարվում է Չինաստանի «Մեկ գոտի, մեկ ճանապարհ» գլոբալ նախաձեռնության առանցքային օբյեկտներից մեկը, ինչպես նաև ՉԺՀ-ի աջակցությամբ Պակիստանում կառուցվող այլ ենթակառուցվածքային օբյեկտներին։