ԹՊԿ-ն ողջունում է «Թրամփի երթուղու» իրագործումը

Թյուրքական պետությունների կազմակերպության (ԹՊԿ) գլխավոր քարտուղար Կուբանիչբեկ Օմուրալիևը հայտարարել է, որ այսպես կոչված «Թրամփի երթուղու» իրագործումը լրացուցիչ խթան կհանդիսանա «Միջին միջանցք» նախաձեռնության հաջողության համար՝ բարձր գնահատելով Հայաստանի և Ադրբեջանի միջև խաղաղության գործընթացում ԱՄՆ-ի միջնորդական դերը։

Ըստ Օմուրալիևի՝ «Թրամփի միջանցքի» (TRIPP) հեռանկարը, որը նա ներկայացնում է որպես միջազգային խաղաղության և բարգավաճման գործոն, նախատեսում է ՀՀ Սյունիքի մարզում 43 կմ երկարությամբ ճանապարհի բացում, որը Ադրբեջանը կկապի Նախիջևանին և կկառավարվի ամերիկյան կողմից։ «Այս ճանապարհը կդառնա Կենտրոնական Ասիայից դեպի Ադրբեջան, այնուհետև Թուրքիայից դեպի համաշխարհային շուկաներ տանող խոշոր առևտրային երթուղու մի մասը։ Մենք այս միջանցքն անվանում ենք «Միջին միջանցք»», - ասել է նա։

Գլխավոր քարտուղարը նշել է, որ այս միջանցքը, որը գտնվում է Հյուսիս-Հարավ և Արևելք-Արևմուտք տրանսպորտային ուղիների միջև, ունի զգալի ռազմավարական առավելություններ, այդ թվում՝ ավելի կարճ տարածություն, բարենպաստ կլիմայական պայմաններ և «ավելի կայուն քաղաքական միջավայր»։ Նա հավելել է, որ ԹՊԿ-ն արդեն իսկ մի շարք նախագծեր է իրականացրել՝ Միջին միջանցքը Եվրոպայի և Չինաստանի միջև արդյունավետ միջազգային առևտրային երթուղու վերածելու համար։ «Տարածաշրջանում համապարփակ խաղաղության և կայունության հաստատումը, ինչպես նաև «Թրամփի երթուղու» իրագործումը լրացուցիչ խթան կդառնան Միջին միջանցքի նախաձեռնության հաջողության համար», - ընդգծել է Օմուրալիևը։

ԹՊԿ ղեկավարը հատուկ ուշադրություն է հրավիրել Հայաստանի և Ադրբեջանի միջև խաղաղության գործընթացում ԱՄՆ-ի բացառիկ դերին։

«Մենք ողջունում ենք 2025 թվականի օգոստոսին Վաշինգտոնում ԱՄՆ նախագահի միջնորդությամբ ստորագրված համատեղ հայտարարությունը, ինչպես նաև «Խաղաղության և միջպետական հարաբերությունների հաստատման մասին» համաձայնագրի նախաստորագրումը։ Այս կարևոր քայլը ցույց է տալիս կողմերի վճռականությունը՝ թողնելու հակամարտության ժառանգությունը և կառուցելու ապագա՝ հիմնված համագործակցության և փոխադարձ հարգանքի վրա։ ԱՄՆ-ի կառուցողական մասնակցությունն առանցքային դեր է խաղացել այս հաջողությանը հասնելու համար անհրաժեշտ պայմաններ ստեղծելու գործում», - նշել է նա։

Օմուրալիևը եզրափակել է՝ այս զարգացումը համարելով «պատմական շրջադարձային պահ» ոչ միայն Ադրբեջանի և Հայաստանի, այլև ողջ Հարավային Կովկասի և նրա սահմաններից դուրս, որը ճանապարհ է բացում դեպի կայուն խաղաղություն, կայունություն և բարեկեցություն։