Օրենքը խստացվում է. երկու օր ինքնակամ բացակայելու դեպքում՝ քրեական գործ

Ռուսաստանի Դաշնության պաշտպանության նախարարությունը առաջարկել է զինծառայողի համար ինքնակամ բացակայության դեպքում քրեական պատասխանատվության շեմը 10 օրից նվազեցնել մինչև 2 օր։ Այս մասին հայտնել է «Վեդոմոստի» պարբերականը՝ հղում անելով երկու իրազեկ աղբյուրների։ Նրանց տեղեկություններով՝ կառավարական հանձնաժողովն արդեն հավանություն է տվել օրենսդրական համապատասխան փոփոխություններին։

Գործող օրենսդրության համաձայն՝ («Զինվորական պարտականության և զինվորական ծառայության մասին» օրենք) զինծառայողը շարունակում է համարվել զորամասի անձնակազմի անդամ, նույնիսկ եթե փաստացի բացակայում է ծառայությունից մինչև 10 օր։ Այս ժամկետը լրանալուց հետո միայն նրա նկատմամբ կարող է կիրառվել քրեական պատասխանատվություն՝ ՌԴ Քրեական օրենսգրքի 337-րդ հոդվածով (զորամասի կամ ծառայության վայրի ինքնակամ լքում)։ Պաշտպանության նախարարության կողմից ներկայացված օրինագծի բացատրագրում նշվում է, որ նման մոտեցումը չի խթանում զինծառայողների շրջանում կարգապահության պահպանումը և դժվարացնում է պարտականությունների կատարման նկատմամբ վերահսկողությունը։

Առաջարկվող փոփոխությունները նախատեսվում է տարածել ինչպես ժամկետային, այնպես էլ պայմանագրային զինծառայողների վրա։ Բացի այդ, նախատեսվում է սահմանել, որ զորամասի ինքնակամ լքման (ԶԻԼ) ժամանակահատվածը չի հաշվարկվի զինվորական ծառայության ընդհանուր ժամկետում։ Ինչպես նշել է Ռուսաստանի իրավաբանների ասոցիացիայի նախագահ Վլադիմիր Գրուզդևը, ներկայումս այդ ժամկետը «10 օրից ավելի» է, և փոփոխությունները կոչված են այս նորմը համապատասխանեցնելու Քրեական օրենսգրքի 337-րդ հոդվածին, որտեղ կնշվի «2 օրից ավելի»։

Վորոնեժի մարզի Փաստաբանների պալատի նախագահի խորհրդական Նատալյա Մալինովսկայան իր հերթին ընդգծել է, որ ծառայությունից բացակայության ժամանակահատվածը չպետք է հաշվարկվի ծառայության ընդհանուր ժամկետում, քանի որ դա սկզբունքային նշանակություն ունի թոշակի հաշվարկման, արտոնությունների ստացման կամ ծառայության ավարտի ժամկետը որոշելու համար։