Հյուսիսային Կորեան հինգ ամսվա դադարից հետո բալիստիկ հրթիռներ է արձակել

Հյուսիսային Կորեան հոկտեմբերի 22-ին վերսկսել է բալիստիկ հրթիռների փորձարկումները՝ հինգ ամսվա դադարից հետո կատարելով մի քանի արձակում դեպի արևելք։ Այս քայլը տեղի է ունեցել ԱՄՆ նախագահ Դոնալդ Թրամփի և այլ համաշխարհային առաջնորդների՝ Հարավային Կորեա կատարելիք այցից և Ասիա-խաղաղօվկիանոսյան տնտեսական համագործակցության (ԱԽՏՀ) գագաթնաժողովից օրեր առաջ՝ զգալիորեն սրելով լարվածությունը տարածաշրջանում։ Սեուլի պաշտոնյաների տվյալներով՝ Հարավային Կորեայի զինվորականները Փհենյանից հարավ ընկած տարածքից արձակել են մի քանի, ենթադրաբար, փոքր հեռահարության բալիստիկ հրթիռներ։ Զենքերը թռել են մոտ 350 կիլոմետր դեպի հյուսիս-արևելք, սակայն դրանց վայրէջքի կոնկրետ վայրի մասին մանրամասներ չեն հաղորդվում։

Այս արձակումները Փհենյանի կողմից առաջինն են մայիսի 8-ից հետո, երբ փորձարկվել էին կարճ հեռահարության համակարգեր, որոնք նմանակում էին միջուկային հակահարվածներ ԱՄՆ-ի և Հարավային Կորեայի ուժերին։ Սա նաև առաջին նման գործողությունն է Հարավային Կորեայի նոր նախագահ Լի Չժե Մյոնգի պաշտոնը ստանձնելուց հետո, որը հունիսին խոստացել էր վերականգնել խաղաղությունը Կորեական թերակղզում։

Փորձագետները նշում են, որ հրթիռների արձակումը կարելի է դիտարկել որպես ուղիղ արձագանք նախագահ Թրամփի վերջին քայլերին և Կիմ Չեն Ընի ռեժիմի կողմից իր ներկայությունը հաստատելու փորձ՝ Սեուլի կողմից կազմակերպվող միջազգային կարևոր միջոցառման նախօրեին։ Ի պատասխան՝ Հարավային Կորեայի զինվորականները հայտարարել են, որ ԱՄՆ-ի հետ ամուր ռազմական դաշինքի հիման վրա պահպանում են ցանկացած սադրանք հետ մղելու բարձր պատրաստականություն։

Ավելի վաղ Հյուսիսային Կորեան ռազմական շքերթի ժամանակ ցուցադրել էր իր, ինչպես պնդում է, «ամենահզոր» միջմայրցամաքային բալիստիկ հրթիռը՝ «Հվասոնգ-20»-ը, որը, ըստ դիտորդների, նախատեսված է մի քանի միջուկային մարտագլխիկներ կրելու համար՝ ԱՄՆ հակահրթիռային պաշտպանությունը հաղթահարելու նպատակով։ Վերլուծաբանները չեն բացառում, որ Փհենյանը առաջիկա ամիսներին կարող է փորձարկել նաև այս նոր հրթիռը։

Հյուսիսային Կորեայի գործողությունները, որոնք ՄԱԿ-ի Անվտանգության խորհրդի բազմաթիվ բանաձևերի խախտում են, միջազգային հանրության կողմից դատապարտվել են։ Այնուամենայնիվ, Փհենյանը շարունակում է իր զենքի ծրագրերը՝ ի պատասխան ԱՄՆ-ի և Հարավային Կորեայի համատեղ զորավարժությունների, որոնք նա դիտարկում է որպես ուղիղ սպառնալիք իր անվտանգությանը։